إزاي تزور حديقة حيوان الجيزة من غير ما تنزل من بيتك؟
الموقع التفاعلي لحديقة الحيوان حدائق القاهرة حديقة الحيوان حديقة حيوان الجيزة زيارة حديقة الحيوان أونلاين موقع حديقة حيوان الجيزة
Mohamed Talaat
حديقة حيوان الجيزة واحدة من أجمل الأماكن اللي بيحبها الأطفال والكبار في مصر، لكن بسبب انتشار فيروس “كورونا” المستجد في عالمنا، قفلت الحديقة التاريخية أبوابها أمام الزوار.. لكن هل ده معناه إننا مانقدرش نزورها؟
مؤخرًا أعلنت وزارة الزراعة المصرية بالتعاون مع مكتبة الإسكندرية، عن انطلاق الموقع الإلكتروني التفاعلي لحديقة الحيوان بالجيزة، والموقع ده بيوفر زيارة كاملة مليانة معلومات للمواطنين، وهو متاح باللغة العربية وكمان الإنجليزية.
تقدروا من خلال الموقع تتعرفوا على تاريخ حديقة حيوان الجيزة، واللي كانت هي وحديقة الأورمان متصلين ببعض ووقتها كانت المنطقة اسمها “سراي الجيزة”، واللي جهزها الخديوي إسماعيل على هامش افتتاح قناة السويس.
هتلاقوا في الموقع معلومات وصور عن كل النباتات في الحديقة، واللي عمرها أكتر من 100 سنة، ومن خلال الموقع هتعرفوا مكان كل شجرة فين ونوعها على خريطة رقمية، ده غير معلومات عن كل الحيوانات اللي بتمتلكها حديقة الحيوانات الأكبر والأشهر والأقدم في الشرق الأوسط، وكمان هتعرفوا مكان كل حيوان فين من خلال الخريطة اللي موجودة في الموقع.
كمان الموقع بيضم معلومات تاريخية عن كل المواقع الأثرية في حديقة الحيوانات زي الجبلاية وممرات الزلط وكوبري إيفيل المعلق، وكله هيكون مدعم بالصور والمعلومات.
الموقع الإلكتروني لحديقة الحيوان بالجيزة فيه 5 مسارات مقترحة للزوار على حسب بوابة الدخول اللي هيدخلوا منها، وكمان بيساعد الموقع زوار الحديقة أونلاين في أنهم يعرفوا أحسن مسار يخليهم يشوفوا بشكل أوسع وأشمل حيوانات الحديقة.
تقدروا تزوروا الموقع الإلكتروني التفاعلي للحديقة من هنا.
مقترح
معالم وسياحة
زاوية أيدكين: حكاية أول خانقاه مملوكية في قلب القاهرة
اثار مملوكية في مصر خانقاه في القاهرة +2
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
