The Definitive Guide to Living in the Capital , Cairo , Egypt

قليل أوي لما تلاقي مكان بيقدم سي فوود وبيعرف يعمله مخدوم سواء في التسوية أو بيقدمه بفكرة جديدة، علشان كده لما سمعنا عن هوت أند جوسي – Hot & Juicy وشوفنا صور له على الفيسبوك كان لازم نروح نجربه.

مكانه جوه تيفولي دوم الشيخ زايد، أول ما تدخل هتلاقيه على الشمال، حتى وأنت ماشي من بره هتلاقي اليافطة بتاعته واضحة ومنورة، عبارة عن Truck فيها كام كرسي عالي عند بار المطبخ وحوالى 5 ترابيزات وكراسي أمامها، المكان بيقوم على فكرة أن الأكل بيتقدم في أكياس حرارية مش أطباق زي المطاعم الأجنبي، ودي فكرة لطيفة وعملية لهم ولنا كمان كمان. 

لما رحنا كان المكان “كامل العدد”، مافيش ترابيزة نقعد عليها خالص فانتظرنا Waiting list لحد ما حد يخلص، حتى اقترحنا عليهم نطلب الأوردر علشان يجهز لحد ما الترابيزة تفضى رفضوا علشان الحاجة بتتعمل فريش ولازم تبقى سخنة.

بعد حوالى نص ساعة قعدنا، وانتظرنا شوية عقبال ما حد ركز معانا وأدانا المنيو علشان نختار أكلنا، المنيو مش كبيرة، فيها أقسام مقبلات والطبق الرئيسي اللي هنشرح لكم تفاصيله بعد الفقرة دي، والإضافات (طبق أرز 10 جنيه، بطاطس 12 جنيه، وعندهم حاجة لطيفة هي أكواز ذرة مسلوقة بتتعمل في كيس حراري برضه 10 جنيه) والشوربة وساندويتشات Wrap والمشروبات والحلو وعندهم كمان قسم للإفطار فيه Spanish Omelet بـ (20 جنيه)، وكلوب ساندويتش تونة (55 جنيه)، وEgg Benedict Salmon بـ (59 جنيه)، وCheese Salmon Wrap بـ (69 جنيه)، وPancake Nutella بـ (49 جنيه).

الطبق الرئيسي بقى بتختاره في 3 خطوات: أول حاجة عندك 3 اختيارات ما بين: الجمبري، وده له اختيارين: Hungry وده عبارة عن 10 قطع جمبري، وExtremely Hungry ده 14 قطعة جمبري، والاختيارين التانيين المحار (89 جنيه) أو كابوريا (179 جنيه/ 4 قطع).

بعد ما بتختار بطل الطبق بتاعك، بعدها بتختار الصوص أو الطعم (النكهة)، فيه اختيارات بين صوص ليمون وفلفل أو صوص ثوم أو Crazy Lemon وده صوص ليمون بالكريمة، وآخر خطوة بتختار درجة السبايسي (صغيرة أو وسط أو مشطشط)، وممكن تعمل ميكس بين الجمبري والمحار والكابوريا في كيس واحد (250 جنيه).

طلبنا من المقبلات حاجة مشهورين بها هي Crab Meat Cheese Fries أو بطاطس محمرة عليها جبنة وقطع كابوريا (65 جنيه)، ومن الأصناف الرئيسية أخدناShrimp extremely hungry  بـ 199 جنيه واختارنا الصوص ليمون بالكريمة وطلبنا منهم يقشروه علشان ناكل على طول، واختارناه عادي مش سبايسي، وطبق أرز (10 جنيه)، أول ما بتعمل الأوردر بينزل الكوفر وبيدوك مريلة بلاستيك تلبسها علشان اللغوصة، وشوكة ومعلقة بلاستيك.

الأكل أخد وقت شوية، وكمان كنا جعانين فحسينا أن الوقت بيعدي ببطء، أول حاجة نزلت كانت البطاطس بالجبنة وقطع الكابوريا.. رائعة، طعم الجبنة مع قطع الكابوريا الصغيرة عاملين ميكس في الطعم جميل جدًا، فكرتها حلوة.

بعدها نزل الأرز والجمبري، طبق الأرز لقيناه صغير فطلبنا واحد تاني، الجمبري كان شكله يفرح وهو في الكيس (حجمه متوسط) والصوص كان شكله يفتح النفس، عبارة عن ليمون وكريمة وشبت، الصوص وهمي، ولحم الجمبري كان غني بالطعم، كنا مستمتعين جدًا وإحنا بناكله لحد ما اتعرضنا لمشكلتين ضيعت استمتاعنا: أول واحدة لما لقينا قشر جمبري وسط الصوص بسبب أنه ما اتقشرش كويس، ولما الشوكة اتكسرت لأنها ضعيفة جدًا وإحنا بنحاول نقطع الجمبري، قولنا المشكلتين للقائمين على المكان واعتذروا ووعدونا أنهم هيخلوا بالهم، وبالنسبة للشوكة هيغيروها بواحدة تانية خامتها أقوى، المكان هنا بيقوم على فكرة اللغوصة والتفصيص أكتر من الأكل بالشوكة والمعلقة وبالتالي دي كانت أول مرة يتعرضوا للنقطة دي لأن الجمبري بتاعنا طلبناه متقشر.

بعد الأكل طلبنا من المشروبات ليمون بالنعناع (22 جنيه) اتقدم لنا في برطمان وكان منعش جدًا وسكره كويس، والحلو المتاح وقتها Heavy Nutella بـ 45 جنيه وده عبارة عن كيك شوكولاتة عليه من فوق صوص نوتيلا ومن جوه فيه نوتيلا برضه، وبرضه متقدمة في طبق بلاستيك، كان طعمها حلو بس كانت تقيلة جدًا ومحتاجة بولة آيس كريم معاها علشان تقلل الدسم شوية.

إحنا طلباتنا ما كانتش كتيرة بس في الآخر بعد إضافة الخدمة والضريبة دفعنا 450 جنيه! تجربتنا في هوت أند جوسي كانت لطيفة تخللها شوية مطبات، بس المكان مميز والمجهود حلو محتاج شوية تضبيط.

هوت أند جوسي لهم صفحة على الفيسبوك.