كل حاجة لها علاقة بالهند والشعب الهندي مبهجة: لبسهم، ألوانهم، الموسيقى والأغانى بتاعتهم، حتى أكلهم، كله ألوان وبهارات تخلي بُقك بيرقص من كتر الفرحة، المطبخ الهندي له مكانة خاصة في المطابخ العالمية، حتى أن البهارات بتاعتهم بدأوا يدخلوها في أكلات مطابخ تانية من قوة طعمها وفايدتها كمان، من فترة بقى لنا بنتوحم على أكل هندي، وبالتالي كان لازم نروح لواحد من أفضل المطاعم في القاهرة: مهراجا – Maharaja فرع الشيخ زايد داخل تيفولي دوم.
موجود أول ما تدخل تيفولي دوم على اليمين، وراء عربية “Hot & Juicy“، فيه مكانين للقعود، واحد Open Air والتانى Indoor بس نصيحتنا اقعدوا جوه لأن الديكورات المبهجة الملونة لها روح تانية عن المكان بره اللي تحسه منفصل ومالوش نفس التيمة، الترابيزات نوعين: ترابيزة زي الطابلية واطية وكنب عليه مخدات كتير، وترابيزات عالية وكراسي عادية، وزي طبيعة أي مطعم هندي بيبقوا مشغلين فى التليفزيون أغاني من الأفلام الهندي المشهورة.
أول ما قعدنا جالنا المنيو ورشح لنا الجرسون الأفضل عندهم، وبعد ما طلبنا الأوردر نزل لنا صينية فيها 4 أنواع من الصوصات: صوص مانجا مخللة، صوص زبادي بالنعناع، وصوص تمر هندي، وأخيرًا فلفل هالوبينو مقطع، ألوان الصوصات جنب بعض كانت تجنن، وكان عندنا فضول نذوق المانجا المخللة لأنها أول مرة تعدي علينا، وبصراحة “اختراع”، مين اللى فكر أنه يخلل المانجا؟ الناس اللى بتحب الحاجات الحريفة هتحبها، هي مش مشطشطة أوي لكن بتدي طعم تاني للأكل لما تضيفها عليه، الزبادي بالنعناع بيلعب دور المهدئ لفيضان النكهات اللي فى الطبق، والتمر هندي ده سكر الترابيزة، طعمه المسكر المزز شوية عالمي وقوامه المتماسك ولونه الأحمر القوي هيشدوك تاخد منه لحد ما تخلصه، وأخيرًا الهالوبينو ده الحاجة الوحيدة اللي ما قربناش منها تاني بعد ما ذقناها لأنها مشطشطة جدًا.
أخدنا شوربة كريمة بقطع الفراخ (25 جنيه)، الشوربة فيها فراخ مع الأعشاب الهندية والبهارات، حابين نقول أننا ياما شربنا الشوربة دي، بس طعمها هنا حاجة تانية خالص، كمية التوابل والأعشاب اللي فيها خلتها في حتة تانية، وكمية قطع الفراخ كانت كتيرة جدًا، كل معلقة أكلناها كانت مليانة بس الشوربة كانت متوازنة في المكونات.
أخدنا كمان Ran Mahraja وده فخذ على طريقة المهراجا (90 جنيه) عبارة عن قطعة من الفخذ محضرة على نار هادية لمدة ساعات، ومعاها بريانى أرز بالخضار (45 جنيه) فعلاً حتة اللحم كانت رائعة مع الصوص الأحمر اللي كان عليها، طرية ومستوية ومافيهاش دهون، تدوب في بُقك والتوابل تحس أنها بتحتفل بها، بجد كل حتة كنا بناكلها فى الأطباق كلها كنا بنستطعمها ونتلذذ بها من جمالها، بريانى الأرز بالخضار برضه كانت ألوانه لوحدها مبهجة، الأرز ألوانه أبيض وأصفر مع ألوان الخضار، فما بالك لما أكل يمتع العين والفم.
آخر حاجة فى الأطباق الرئيسية رشحها لنا الجرسون كانتLasooni Tikka ودي صدور فراخ بالثوم (60 جنيه)، قطع صدور فراخ متبلة بالثوم والأعشاب المشوية على الفحم بدون عضم، واختارنا معاها Kashmiri Pullao كاشميرى بولاو (50 جنيه) ده أرز بسمتي كاشميري بالكاجو والزبيب والزعفران، الفراخ طرية جدًا عليها صوص أصفر غني بالتوابل والثوم، الصوص ما كانش كتير أوي بس كان فى الجون، كان نفسنا يكون أكتر من حلاوته، طعم الفراخ الطرية مع الأرز الملون والكاجو المقرمش والزبيب المسكر كان عالمي، من الآخر كرنفال نكهات، بجد من المرات القليلة اللي بتتمنى فيها الأكل ما يخلصش.
بعد ما خلصنا أكل وما كناش قادرين نتنفس لقينا الجرسون نزل لنا تحلية Complimentary من المكان غالبًا علشان قلنا لهم أننا أول مرة نيجي، كان عبارة عن آيس كريم جوز هند محطوط جوه قشرة جوز هند حقيقية معاه في طبق تاني جزر سوتيه بجوز هند مبشور وكاجو شرايح، الآيس كريم لما تذوقه تحس أنك فعلاً بتاكل حتة جوز هند، طعمه قوي جدًا وساعد على تهدئة بُقنا من كمية التوابل اللي أكلناها، الجزر بجوز الهند والكاجو كان رائع ومزجهم سوا كان لوحة فنية.
زيارتنا لمطعم مهراجا كانت ممتعة من كل النواحي، من أفضل المطاعم الهندي اللي رحناها في حياتنا، ده غير أن الجرسونات مهذبين جدًا ودمهم خفيف ومتعاونين، عندهم منيو صغيرة بتاخدها معاك لو عاوز تطلب دليفري من البيت، وأكيد هنعمل كده.
