The Definitive Guide to Living in the Capital , Cairo , Egypt

كل يوم بيظهر مطعم جديد في العاصمة المصرية بيحاول ينافس وحوش الأكل المصري الأصلي زي صبحي كابر وغيره.. ومن المطاعم المميزة اللي بنعتبرها نجحت في المنافسة بامتياز هو مطعم” درش” إمبابة، واللي جربناه مؤخرًا ولقينا عنده أجمد المشويات والطواجن. تعالوا ننقل لكم تفاصيل تجربتنا هناك.

المطعم رغم أنه صغير والصالة بتاعته مش كبيرة إلا أنه فيه كتيبة من العاملين بيتحركوا زي خلية النحل ومتواجدين دايمًا حواليكم، وهو زي أي مطعم أكل مصري شعبي مشابه، مش مهتم بالديكورات، لكنه مهتم جدًا بالأكل اللي بيقدمه لجمهوره، وفي البداية نحب نقولكم أن المشويات عنده عظيمة جدًا.

جربنا من عنده ريش مشوية وسعرها كان 87 جنيه، ونقدر نقول إن الريش عظيمة وكمان متتبلة ومشوية صح، وتحس إنها معسلة ومافيش فيها أي ريحة للضاني، وكمان جربنا فتة سادة بـ20 جنيه، ويكفي جدًا الدقة اللي معمولة بيها واللي تخليك تطلب طبق واتنين منها.

كمان جربنا من عندهم ستيك مشوي بسعر 145 جنيه، ونقدر نقول عليه عظمة على عظمة، سواء في تسويته أو شويه أو حتى تقطيعه، وجربنا كمان الممبار كمقبلات بسعر 25 جنيه للربع كيلو، لكنه كان ناشف شوية ومش أحسن حاجة، والطعم مش قوي.

ومن ضمن الأطباق اللي جربناها هناك كمان، طاجن الفريك وطاجن التورلي باللحمة وسعر الواحد كان 70 جنيه، ولكن خلينا نقول إن الطواجن محتاجة تبقى أحسن من كده بكتير لأن الفريك ماعجبناش قوي، ومش مستوي كويس، كمان طاجن التورلي اللحمة اللي فيه ماكنتش مستوية 100%.

وكمان جربنا 1/4 مشكل لحوم مشوي بسعر 72 جنيه، وكان كباقي المشويات حلو ومميز في طعمه، وكانت تجربتنا مع طبق المحشي اللي سعره 20 جنيه حلوة وبننصح بيها كمقبلات.

بصفة عامة نقدر نقول إن تجربتنا في المكان كانت إيجابية بدرجة كبيرة، ومشينا منه وإحنا مبسوطين بالأكل رغم بعض الملاحظات.

وعلشان تعرفوا أكتر عن مطعم درش تقدروا تزوروا صفحتهم على الفيسبوك من هنا.

وطبعًا بنفكركم بالالتزام بكل الإجراءات الاحترازية علشان تحموا نفسكم من فيروس كورونا المستجد.