The Definitive Guide to Living in the Capital , Cairo , Egypt

في ليلة جميلة من ليالي القاهرة الساحرة كنا سهرانين في “كيجي-Keji” ومستمتعين بالنيل الجميل. المطعم ده من الأماكن اللي بتجمع بين مطبخ اليابان وبيرو بطريقة مميزة. نبتدي مع المكان الشيك والأنوار الهادية جدًا، وكل تفصيلة في المكان اللي أبهرتنا وخصوصًا السلاسل المعلقة في السقف ونازل منها فوانيس الإضاءة البسيطة.

مساحة المطعم معقولة جدًا ومناسبة لشكله العصري الأنيق، يعني لا هو كبير لدرجة يزدحم وتحصل دوشة، ولا هو صغير لدرجة إنك تلاقي اللي في الترابيزة اللي جنبك قاعد معاك وسامع كل كلمة بتقولها. جزء كبير من المكان يحتله بار أنيق، وفي سلالم في الأخر بتطلعك على بلكونة مطلة على الدور الأول من المطعم.

كل الجمال اللي فات كوم ومنيو كيجي كوم تاني خالص. المنيو عبارة عن تعاون مشترك بين مطبخ اليابان وبيرو – بيطلق عليه مطبخ نيكاي Nikkei cuisine – وفيها بيستخدموا مكونات الأكل من مطبخ بيرو ويعملوها على الطريقة اليابانية علشان في الأخر نأكل أكلات ساحرة. كل طبق هنا فيه لمسة زيادة بتصنع الفارق، من أكلات محبوبة زي تونا تاكو (95 جنيه) أو  Roasted Chicken Empenadas (ثمنه 65 جنيه) أو أطباق ceviches (ثمنه 95 جنيه) مع tiraditos (ثمنه 125 جنيه – 150 جنيه) وسلاطات ونودلز، وحتى السوشي موجود في المنيو.

طبعًا التونا تاكو من اسمها هتخليك تجوع، بس إحنا قررنا نقاوم ونجرب braised beef (ثمنه 85 جنيه). اللحمة كانت مستوية كويس وبتدوب من كتر جمالها، والفلفل عمل طعم قوي مع النعناع الفريش والخيار والفجل.

نسيب قسم Fun Bites/Picadillos ونروح لقسم المقبلات اللي جربنا منه Causachi San (ثمنه 85 جنيه)، عبارة عن ثلاث كرات مقلية من البنجر والبطاطس وجبن الماعز والبندق وشرائح تفاح أخضر. يمكن الطبق مش خفيف زي معظم أكلات منيو كيجي – هو كان ثقيل بصراحة – بس جبن الماعز والبطاطس والبنجر عملوا تركيبة هايلة، ويمكن كان ينقصه بس طعم التفاح اللاذع وطعم البندق.

وصلنا لأهم مرحلة في الأكل وهنا عملنا قرار تاريخي وبدل ما ندخل على الأطباق الرئيسية لاقينا إن المنيو فيها أكلات تانية لازم نجربها، وأحسن مثال نعرف منه إزاي مطبخين مختلفين زي اليابان وبيرو يطلع منهم أكلة عبقرية هو طبق Salmon Tiraditos (ثمنه 140 جنيه). الطبق عبارة عن سمك نئ متقطع على طريقة الساشيمي ومعمول بصوص سبايسي وشوية إضافات. السالمون هنا كان عليه هليون مشوي وAji Amarillo – نوع من أنواع الفلفل – وثوم مقلي. اليابانيين معروف عنهم حبهم للسمك النئ من غير إضافات، بس نسخة بيرو مليانة توابل مع الصوص السبايسي وتعتبر من أحلى الأطباق اللي جربناها يومها.

معانا من قسم السوشي أكلة مشتركة تانية وهي Makki Nikkei Ceviche (ثمنه 120 جنيه). مرة تانية لاحظنا إن سر جمال الطبق هو حاجة مش متوقعة، يعني مافيش شك إن الجمبري المقلي والأفوكادو والسمك كانوا تحفة، بس كلمة السر هنا كانت صوص ceviche. استقرينا شوية عند منيو السوشي وطلبنا أطباق تقليدية شوية زي سالمون ساشيمي (80جنيه/أربع قطع) اللذيذ، مع النسخة الغربية من السبايسي سالمون تمبورا ماكي (95 جنيه/ خمس قطع) والطبق ده هايل لمحبي السوشي.

الأطباق الرئيسية بصراحة كلها تفتح النفس من اسمها في المنيو بس، بس إحنا محسيناش بأي ندم إننا مجربناش. لازم كمان نقول إن الأكلات اللي اخترناها من أقسام fun bites والسوشي والمقبلات كانت روعة ومعمولة بمزاج وبتقول إن التعاون المشترك بين اليابان وبيرو – الغريب شوية على الأكيلة – بيطلع منه عجايب. الفكرة إن في أساليب طبخ ومكونات كتيرة ممكن كيجي يستخدمها عشان يعمل أطباق خاصة به، لكن السؤال اللي بيطرح نفسه: هل هيقدروا يحافظوا على مكانتهم المميزة؟ كل المؤشرات بتقول كده، حتى ولو كانت الأسعار غالية شوية.