The Definitive Guide to Living in the Capital , Cairo , Egypt

رنا شرف

الأكل المصري معروف بجبروته.. قصدنا بحلاوته، ومافيش حد يقدر يقاوم سفرة عليها أكلات مصرية عظيمة، وخصوصًا الملوخية، ويا سلام لو معاهم طاجن أرز معمر بالحمام! حاجة وهمية. علشان كده وإحنا في الساحل الشمالي، كان نفسنا نروح مطعم فيه أكل مصري أصلي، ومن بين مطاعم كتير هناك لفت نظرنا مطعم “قصر الكبابجي”، فقررنا نجرب أكله، علشان نعرفكم تفاصيل التجربة.

المكان شيك جدًا، وأول ما هتدخله هتحس إنك سافرت لعالم مختلف، ودخلت في موود جميل. الكراسي مريحة، وكل ترابيزة عليها طبق وشوكة بلاستيك وملعقة بلاستيك، ومطهر ومناديل.

نيجي بقي للأطباق، طلبنا برام أرز معمر بالحمام، وده كان مش وحش بس كان ممكن يكون أحسن، الأرز كتير لكن قطع الحمام مش كتير، يعني حسينا إن البرام كأنه فاضي رغم إن سعره 192 جنيه.

كمان جربنا شوربة الكوارع، وكانت حلوة بصراحة ومعمولة بمزاج، وسعرها 102 جنيه.

مش معقول مانجربش المشاوي، ده إحنا في قصر الكبابجي، فأخدنا طبق كفتة ربع، حجم قطع الكفتة كان كبير، وكانت منفوخة زي الأسطوانة! وطعمها كان حلو، لكنها كانت دسمة جدًا، وسعر الطبق 122 جنيه.

طلبنا كمان طاجن ملوخية، والحقيقة إنها كانت عالمية وحاجة فوق الروعة، عجبنا جدًا إن الملوخية نزلت لنا مع شو طبل بلدي مخصوص! ودي حركة لذيذة من المطعم وهو بيقدم الملوخية، وعادي وأنت هناك تسمع صوت شو الطبلة البلدي عند الترابيزة اللي جنبك، وده معناه إنهم هم كمان طلبوا ملوخية! سعر طاجن الملوخية 75 جنيه.

نزل لنا مع الأكل سلاطات؛ طماطم مخللة وسلاطة الراهب، وسلاطة خيار مخلل، وكل طبق سعره 29 جنيه. بشكل عام السلاطات حلوة بس السعر والكمية مش متناسقين.

عنوان قصر الكبابجي: مارينا 5، الساحل الشمالي.

أحسن حاجة: الملوخية.

أسوأ حاجة: الخدمة كانت محتاجة تكون أسرع.