The Definitive Guide to Living in the Capital , Cairo , Egypt

كلنا عارفين إن القاهرة خلال الكام سنة اللي فاتوا قدمت لنا مطاعم برجر لها وزنها زي مينس وسولت وبرجر تراك وغيرهم من الأماكن القوية. طبعًا الكلام ده مش بنقصدك بيه إن مافيش مكان لمنافسين جداد يقدموا أوراق اعتمادهم لأكيلة القاهرة.

فات برجر فتحوا في مكان مختلف شوية عند مخرج طريق القاهرة الإسكندرية الصحراوي، وهو أخر فرصة للناس اللي مسافرة لو عايزين يأكلوا حاجة قبل ما يطلعوا على الطريق.

شكل المكان واخد طابع كلاسيكي بالمطبخ المفتوح اللي بتشوف فيه أكلك بيتحضر قصاد عينك، والمنيو نفسها بسيطة وواضحة ومحددة.

ابتدينا بطبق من أشهر أطباق المطعم وهو فات وينجز (28 جنيه)، عبارة عن فراخ طرية مقلية ومقرمشة ولها نكهة مدخنة، وعليها صوص باربيكيو.

نروح للساندويتشات وهي دوبل (20 جنيه) كريسبي تشيكن كومبو (60 جنيه) ومعاه بطاطس محمرة رفيعة عليها شوية شيلي صوص (10 جنيه) وجبنة (6 جنيه).

البطاطس كان لها نفس طعم البطاطس المجمدة العادية، بس الجبنة الشيدر السايحة وصوص الشيلي المملح عملوا طعم كويس. أما الساندويتش فعبارة عن قطعتين صدور فراخ مقلية مقرمشة عليهم جبنة وخس وطماطم ومايونيز، بس العيب الوحيد إن الفراخ كانت مزيتة شوية.

طلبنا كمان دوبل (20 جنيه) مشروم سويس فات برجر (59 جنيه) بيكون عليه جبنة سويسري ومشروم. الجبنة هنا قليلة شوية، لكن كمية المشروم كانت كفاية واللحمة العصارية لها طعم مميز.

أخيرًا وليس أخرًا، ماكانش ينفع نمشي من غير ما نجرب كولوسال كواد برجر (108 جنيه/كومبو). البرجر العملاق عبارة عن أربع قطع لحمة عليهم خس وجبنة ومايونيز. مفيش كلمة في قاموس اللغة العربية توصف البرجر ده غير “عصارية”؛ طبعًا شكله يفتح النفس، وإحنا طلعنا على مستوى الحدث وقدرنا نخلص على البرجر اللي كل قطعة فيه غنية بتتبيلة مميزة ورائحة تفتح النفس.

مافيش أي شك إن البرجر كان عصاري وطري، بس المشكلة إن الساندويتش بشكل عام كان ناشف جدًا ومحتاج صوص يضبط الكلام.

فات برجر بيقولوا إنهم أخر عظماء البرجر، وهم نوعًا ما كلامهم صح. نقدر نقول إنهم من أحسن مطاعم الفاست فوود في القاهرة، بس مش واصلين لمستوى مطاعم البرجر الفخمة. أكيد فات برجر يستحقوا تجربهم قبل ما تطلع على الطريق. توصلوا بالسلامة!