The Definitive Guide to Living in the Capital , Cairo , Egypt

من الأكلات المفضلة اللي لازم تلاقي حد في كل عيلة بيعشقها هي “الرنجة والفسيخ”. دي أكلات ورثناها من زمان ولها مكانة خاصة في قلوب محبيها. ورغم إنها أكتر أكلة موجودة في أوقات زي العيد وشم النسيم، إلا أننا مؤمنين إن الرنجة والفسيخ مالهومش موسم، وتتاكل في أي وقت حسب الرغبة. وسمعنا عن مكان اسمه “سلاحف الرنجة” اللي عندهم ابتكارات جديدة زي السوشي والشخرمون، فقرّرنا نجرب ونقول لكم رأينا.

المكان شعبي وفيه روح ولاد البلد، موجود في منطقة عابدين الشعبية المعروفة، واللي فيها بعض الأماكن المميزة اللي بتقدم أكلات مخصوصة. المكان صغير، وفيه 3 أفراد بيخدموا العملاء، وعندهم 3 ترابيزات بلاستيك أوت دور. قررنا نجرب من عندهم سندوتشات رنجة، وسعر الساندوتش الكبير كان 30 جنيه. كمان جربنا ساندوتش بطارخ مرملة بـ 20 جنيه، ورنجة بيستاشيو بـ 30 جنيه. طعم الرنجة كان عادي، يعني مش حاجة خارقة، لكن هو الطعم الأصلي اللي كلنا متعودين عليه. أما رنجة البيستاشيو، ما حسّناش بطعم البيستاشيو بشكل واضح، وكان طعمها مسكر شوية.

وبما إنهم مشهورين بابتكاراتهم، قررنا نطلب عرض “السلحوف” بـ 210 جنيه. العرض كان عبارة عن طاجن شخرمون صغير (رنجة بالبشاميل)، وقطعتين ريد بطروخ سوشي، وقطعتين إستريبس رنجة، مع بطاطس وسلطة وعيش وعصير جوناتو (عصير ليمون). طاجن الشخرمون كان جميل وتجربة جديدة، السوشي كان لطيف وفكرته حلوة، أما الاستريبس بالصوص الحار فكان لذيذ جدًا. العصير كان أقل من المتوقع، ماكنش مميز.

التجربة كانت مقبولة، بس الأوردر خد حوالي ساعة علشان يوصلنا كامل رغم إنهم قالوا إن الانتظار 10 دقايق بس. السوشي خد وقت زيادة في تحضيره. عندهم ابتكارات تانية زي “هوبا نينو رنجة” و”رنجة عسل بالمكسرات” و”شربات فسيخ” و”رنجة بالمورينجا”، وأسعارهم بتبدأ من 80 جنيه.

العنوان: 111 شارع محمد فريد بجوار فرع قطونيل.

رقم التليفون: 01111751229.

تقدروا تعرفوا أكثر عنهم من خلال صفحة الفيسبوك من هنا.