The Definitive Guide to Living in the Capital , Cairo , Egypt

الإفطار بره في رمضان أحيانًا بيكون مرهق ومتعب سواء للعملاء أو العاملين في المطاعم، لأن الضغط بيكون كبير وكل شخص محتاج أفضل خدمة وأحسن أكل وطبعًا ده حقهم، وفيه ناس بتقدر تنجح في أنها ترضي عملاءها وفيه ناس تانية بتجتهد على قد ما تقدر، وده برضه نوع ناجح لأن اجتهاده مهم، ولكن فيه نوع ثالث لا عاوز ينجح ولا بيجتهد ولا تقريبًا فارق معاه، على الرغم من أن جودة أكله حلوة، والنوع ده اللي لقيناه في مطعم الإمام في السيدة زينب!

في السطور الجاية هنحكي لكم عن تفاصيل تجربتنا عند “الإمام”.

أولًا، حاولنا نحجز بالتليفون وللأسف ماكنش مجمع خالص، وحجزنا من خلال الصفحة، ووصلنا المكان، لقيناه دورين، الأول ريسيبشن والثاني صالة طعام، واللي الكراسي والترابيزات بتاعتها هتحسسكم بالفخامة، وفريق العمل كبير جدًا، ولكنه “عدد بلا مدد”، وهنقول لكم ليه في السطور الجاية.

طلبنا الأوردر وكله تمام والأكل كله كان مشويات تقريبًا، ولكن الغريب أن مافيش “بلح أو عصير” للإفطار نزل رغم أننا طلبنا ده، وكمان طلبنا سلاطات قبل الأكل وماجتش وطلبناها تاني بعد الأكل وبردوا ماجتش رغم أن الكابتن أخد الأوردر وكتبه، وقولنا مش مشكلة أهم حاجة حلاوة الأكل طبعًا، فدخلنا على الأكل.

طلبنا شوربة حمام سعرها 30 جنيه وكانت البهاريز فيها كتير وبسطتنا لحبنا فيها، وكمان طلبنا شوربة لسان عصفور بـ15 جنيه وكانت شغالة وكويسة، وطلبنا طلب مكرونة بشاميل اللي جه في طبق فويل وطعمه كان عادي مافيهوش أي حاجة، وسعره كان 45 جنيه.

كمان طلبنا ½ أرنب بالملوخية، وسعره 150 جنيه، وطعم الأرنب كان جميل ومتسوي كويس، ولكن الملوخية كانت “صايصة” شوية، وبييجي معاهم “حبة أرز” والأرنب كان محمر حلو، وكمان طلبنا ¼ كباب وكفتة سعره 147.5 جنيه وكان طعمهم حلو وخاصة الكفتة اللي اتشجعنا وطلبنا منها طلب كان سعره 202.5 جنيه.

وكمان طلبنا ربع فراخ محمرة وكان سعرها 60 جنيه ووجبة فراخ سعرها 75 جنيه، وطعمهم كان عادي مافيهومش أي جودة زيادة، ولكن الصدمة لما طلبنا “حمام” محشي أرز وسعره 115 جنيه، والحقيقة معجبناش خالص ومكنش أفضل حاجة، وصحيح إحنا مقدرين أننا في رمضان والضغط كبير، لكن في اليوم اللي رحنا فيه المكان كان نصفه تقريبًا فاضي بسبب أننا لسه أول رمضان والأكل بره البيت مش كتير.

بشكل عام، الأكل في المكان حلو، والمكان نفسه لطيف وروحه حلوة، وتقدروا تعتمدوا عليه كمان في عزومات كبيرة، المشكلة الأكبر هي الخدمة.. بعافية شوية!

تقدروا تعرفوا أكتر عنهم من خلال صفحة الفيسبوك من هنا.