The Definitive Guide to Living in the Capital , Cairo , Egypt

في شارع جامعة الدول العربية هـ يلفت نظرك مكان كده لا
هو محل ولا كشك ولا حتى عربية أكل، هو شبه عربية القطار أو الكرفان وفيه شبابيك
ومدهون باللون الأبيض واليافطة بتاعته حمراء، ده محل «أوتو ماركت – Auto Market» للمأكولات السريعة والتيك آواي، ممكن
تركن عربيتك أمامه وتطلب ساندويتشات أو وجبات بعد ما تنادي لواحد من الجرسونات
التابعين للمحل الواقفين أمامه.

طلبنا تيك آواي من «أوتو ماركت» وجالنا بعد حوالي 45
دقيقة، رغم أن المسافة مش بعيدة، وطلبنا كل الأكلات المميزة أو اللي اشتهر بها
المطعم، وأولها طبعًا طبق الفشنكاح (55 جنيه) اللي بـ يكفي فردين، والاسم مشتق من
أكلة عادل إمام في فيلم «التجربة الدنماركية» وهي المشنكاح اللي ما حدش عارف إيه
هو، وفي «أوتو ماركت» الفشنكاح عبارة عن طبق كبير فيه محشي ورق عنب وممبار بقري
وضاني محشي باذنجان وقطعتين من كل أنواع اللحوم والفراخ زي الكباب والكفتة والبانية
والشيش طاووق والكبدة والسكالوب، وقطعة كانيلوني وبطاطس محمرة، طبق جبار ما يقدرش
عليه غير الأكيلة، والطعم والصنعة حلوين بس مع التنوع الكبير ده لازم تلاقي حاجة
وسط الحاجات دي مش واخدة حقها في التسوية أو في التتبيلة، لكن في العموم الطبق
جامد وبـ يشبع، وهـ تحس أنك مش مشتاق لأي أكل ثاني لمدة 3 أيام بعدها، علشان أنت
تقريبًا أكلت كل حاجة في “الفشنكاح”.

جربنا ساندويتش الفراخ البانية المضغوطة (14 جنيه) اللي
سمكها بـ يبقى أقل وقرمشتها أكثر، كان أحسن من غيره العادي، والسوسيس (10 جنيه)
كان مستوي زيادة بس لذيذ وحجم الساندويتش كان صغير، وتضايقنا بس أنه خلص بسرعة.
الكبدة الإسكندراني (6 جنيه) كانت مولعة نار! فلفل كثير وما تطلبهاش إلا وفيه مياة
ساقعة قريبة منك، بقنا ولع لدرجة أن عينينا دمعت، ومع ذلك عجبتنا وقررنا المرة الجاية
نطلبها من غير فلفل، بس تبقى نفس مشكلة الحجم، الساندويتش الشامي كان نصف رغيف
صغير قوي.

طلبنا سلاطة بابا غنوج (أي نوع سلاطة بـ 6 جنيه) وكانت
لذيذة وسميكة، وبطاطس محمرة (5 جنيه) وكانت مالهاش لازمة علشان طلع فيه بطاطس في
الفشنكاح، وهي أصلًا مش حلوة قوي.

المنيو غني وفيه أطباق مشويات كثير وحواوشي ومكرونات وأرز
بالخلطات المختلفة ده بجانب كل أنواع الساندويتشات الموجودة في أي محل أكلات سريعة
وأسعارها من 4 لـ 40 جنيه! أغلى حاجة الجمبري الكبير طبعًا. وعندهم شوربة كوارع
ولسان عصفور، وأخيرًا مشروبات وكوكتيلات مختلفة (من 10 لـ 15 جنيه).

الأكل وصل دافئ رغم التأخير البسيط، ومعرفتنا السابقة بـ
«أوتو ماركت» بـ تخلينا نلجأ له في الطوارئ لما تختلف أذواق مجموعة من الأشخاص على
الأكل، لأنه إلى حد ما بـ يرضي كل الأذواق وأسعاره في متناول الجميع، والأهم من ده
كله أن مكانه في شارع جامعة الدول حيوي جدًا.