-
34 شارع طيبة متفرع من شارع مكة – الدقي
-
Ramy Soliman
منيو أكلي فيها تشكيلة ساندويتشات محترمة، منها ثمانية ساندويتشات ساخنة زي مخ مقلي ودجاج سوفلاكي وفراخ بانيه، وساندويتشات باردة منها تونا أفوكادو ولسان مسلوق. المنيو كمان فيها شوية وجبات منها حمام محشي وطاجن لحم ضاني.
قررنا نكلمهم ونطلب على أمل يكون مستوى الأكل اتحسن، وطلبنا وجبتين كومبو: جمبري بانيه (70 جنيه) وفايربيرد (54 جنيه) ومعاهم ساندويتش روست بيف (42 جنيه). الطلب وصل بعد 45 دقيقة زي ما قالوا والحلو في الموضوع إنه وصل سخن كأنك بتأكل في المطعم.
نبتدي مع ساندويتش الجمبري بانيه اللي بيتقدم في عيش فينو خفيف والجمبري فيه كان مستوي كويس جدًا ومقرمش، بس المشكلة إن مكونات الساندويتش كانت قليلة جدًا ومفيش مخلل capers وكمان الليمون بالمايونيز طلع مايونيز عادي.
شكل تقديم الساندويتش برضه مكانش على المستوى غير اللي كنا متوقعينه خالص.
حسينا كمان إن ساندويتش الفايربيرد كان فيه نفس مشكلة نقص المكونات، بس بصراحة الفراخ كانت مقلية زي الكتاب ما بيقول ومقرمشة وصوص الفايربيرد عمل طعم مميز.
نروح للروست بيف اللي ممكن نقول إنه ساندويتش تقليدي وزي ما إحنا توقعناه، بس في حاجات كتير أكيد هتعجبك في الساندويتش؛ يعني مثلًا الخضروات كانت طازة وممتازة، وكمية المايونيز كانت مضبوطة.
والساندويتش مليان روست بيف مستوي صح الصح على عكس الساندويتشين اللي فاتوا. العيب الوحيد في الساندويتش إن الجبنة كانت قليلة. أما البطاطس المحمرة فكانت متقطعة قطع تخينة وكميتها كانت مناسبة، وكمان مقرمشة من بره ومتحمرة كويس من جوه.
خلصنا الأكل مع طبق بانا كوتا (15 جنيه) وفعلًا كان ممتاز وغني بالكريمة، بس الكريمة كانت سايحة شوية غالبًا من الحر.
تجربة الديلفري من أكلي كانت لطيفة جدًا. الأكل والمكونات كانوا كويسين، لكن فيه شوية مشاكل قابلتنا زي شكل الساندويتشات والمكونات الناقصة في ساندويتش الجمبري وحشو الساندويتشات عمومًا.
