من أغاني عبد الحليم لقلم نجيب محفوظ.. ٤ كتب فنية وثقافية تستاهل وقتك في الصيف
ترشيحات كتب دار الكرمة دار غايا عبد الحليم حافظ عمرو فتحي فايزة أحمد قراءة في الصيف كتب ثقافية كتب فنية مشروع ثقافي مكتبات القاهرة نجيب محفوظ
Cairo 360
الصورة الرئيسية: Dan Dumitriu
فيه نوع من الكتب كده لما تمسكه، تحس إنك بدأت رحلة فنية وثقافية شيقة ومافيهاش ملل، وده بالظبط اللي عمله الكاتب والباحث عمرو فتحي في 4 كتب ممكن نعتبرهم أقرب لمشروع فني ثقافي متكامل. كتب بتتكلم عن رموز كبيرة زي عبد الحليم وفايزة أحمد، وبتفتحلك باب جديد على أفكار نجيب محفوظ في الكتابة، وبتجاوبك على السؤال الأبدي: “أقرأ إيه؟”.
الكتب دي مش بس ممتعة ومكتوبة بأسلوب سهل القراءة، لكن كمان مناسبة جدًا للقراءة في الويك إند أو وأنت مسافر في إجازة أو حتى على البحر.
والمميز إنهم متوفرين في مكتبات القاهرة، فـ تقدر تشتريهم بسهولة وتغوص في عالم مختلف من الحكي والمعرفة.
تعالى نعرّفك على كل كتاب منهم، علشان تختار اللي يناسبك وتبدأ رحلتك.
موسوعة أغاني عبد الحليم حافظ – دار الكرمة – 2019
لو بتحب عبد الحليم حافظ، الكتاب ده كنز حقيقي! عمرو فتحي قضى ست سنين من عمره بيجمع فيه تفاصيل أكتر من 300 أغنية لحليم، من أول اسم الشاعر والملحن، لحد العازفين والحفلات اللي اتغنت فيها. هتلاقي فيه كمان صور نادرة، وحكايات يمكن أول مرة تعرفها عن أغاني حليم اللي حبيناها.
الكتاب موسوعة ممتعة لكل عاشق للفن والطرب الأصيل.
قائمة القراءة – دار الكرمة – 2023
أكتر سؤال بيحيّر أي حد بيحب الكتب: أقرا إيه؟ والكتاب ده هو الحل. عمرو فتحي جمع فيه ترشيحات 75 كاتب وكاتبة من أهم الأسماء في العالم العربي، من نجيب محفوظ وأدونيس لحد أحمد خالد توفيق ورضوى عاشور. هتلاقي فيه ترشيحات أدب، فكر، تاريخ، روايات.. كل حاجة! يعني تقدر تعتبره بوصلتك الشخصية لعالم الكتب.
نجيب محفوظ… عن الكتابة – دار الكرمة – 2025
لو بتكتب، أو فقط بتحب الأدب، الكتاب ده ليك. عمرو فتحي جمع تصريحات وآراء نجيب محفوظ عن الكتابة من عشرات الحوارات النادرة ورتبها في كتاب واحد صغير الحجم لكن قيمته كبيرة جدًا. من أول أفكاره عن الإلهام، للفصحى والعامية، لحد رأيه في النقد والسينما. كأنك قاعد مع نجيب محفوظ نفسه وبيحكي لك عن تجربته في الكتابة.
فايزة أحمد كروان الشرق – دار غايا – 2025
لو بتحب الغنا الشرقي الأصيل، لازم تقرأ الكتاب ده، اللي بيوثّق مسيرة فايزة أحمد من أول أغنية لحد آخر نغمة. هتلاقي فيه تواريخ الأغاني، المؤلفين، الملحنين، الحفلات، الأفلام، آراء النقاد، وكواليس تستحق القراءة. الكتاب نتيجة بحث استمر 4 سنين في دار الكتب وسور الأزبكية ومواقع محبي فايزة.. يعني مجهود يستحق كل تقدير.
