كل اللي محتاج تعرفه عن معرض القاهرة الدولي للكتاب 2018
Ahmed Abd El Gawad
معرض القاهرة الدولي للكتاب، احتفالية كل سنة بتتعمل في أرض المعارض بمدينة نصر، وبيتجمع فيها آلاف الناشرين، والحدوتة كبيرة وقديمة، بدأت من سنة 1969، لما كانت القاهرة هتحتفل بعيدها الألفي، وكان وزير الثقافة وقتها ثروت عكاشة، واهتدى لفكرة إقامة معرض للكتاب، وكان اختياره في محله، لإنه وقتها اختار الكاتبة المعروفة سهير القلماوي، علشان تقوم بالمهمة دي، وبدأت أول فعالية للمعرض.
تفاصيل المعرض السنة دي
من الحاجات اللي بتميز المعرض، هو الاحتفاليتين الأكبر للمعرض، واحدة بشخصية العام، وفي كل سنة بيتم اختيار شخصية مصرية ويتعمل على شرفها اللقاءات والندوات، وكتابة الأبحاث، لبيان مجهوداتها في خدمة الثقافة والأدب والفن، والاحتفالية التانية بتكون الدولة اللي بيحتفل بيها المعرض كل سنة، وبيسميها (ضيف شرف المعرض)، ودي بيتم اختيارها عن طريق لجنة مسؤولة بتحدد شخصية المعرض والدولة كمان.
السنة دي الدولة ضيف الشرف هي الجزائر، وشخصية العام هو المفكر عبد الرحمنت الشرقاوي، أما الشعار اللي هاتقوم عليه الفعاليات فهو (القوى الناعمة، كيف)، وهيتم مناقشة عدد كبير من دوواين الشعر الجديدة، وهيتعمل محور مخصوص اسمه “مائدة السرد” علشان يناقشوا المجموعات القصصية والروايات الجديدة، والمحور الأساسي في مناقشات المعرض هايكون حوالين شعاره، واللي هايتكلم عن قضايا وظواهر أدبية ناقشت فكرة القوى الناعمة.
ومن اللفتات الجميلة لمعرض 2018، إنه هيتم تسمية القاعة الرئيسية باسم الكاتب “عبد الرحمن الشرقاوي“، أما المقهى الثقافي هايبقى باسم شاعر الغلابة المبدع “أحمد فؤاد نجم“، وكمان هاتبقى فيه قاعة باسم الشاعر الراحل “محمد أبو المجد”، وهايتم تكريم عدد من الشخصيات الأدبية الراحلة زي الروائى مكاوى سعيد والكاتب محفوظ عبد الرحمن.
2 مليون شخص
المعرض مدته بتكون أسبوعين ممتدين من آخر يناير كل سنة، لحد 10 أيام من فبراير، وبيزوره تقريبًا 2 مليون شخص كمتوسط، ومن أكتر الحاجات اللي بتميز المعرض، هو وجود تجمع كبير للناشرين والكتاب من كل دول العالم، وكمان إنه مليان نشاطات مختلفة، نشاطات تشكيلية وأدبية وثقافية وندوات.
مقترح
معالم وسياحة
برج القاهرة.. زهرة اللوتس اللي قالت "لا"
البرج برج القاهرة +4
الحياة في كايرو
