شفاء الموجوع فى أحوال دولة المخلوع
شفاء الموجوع فى أحوال دولة المخلوع: الكوميديا السوداء للشعب المصرى
-
جمال فتحى
-
أدب ساخر
-
من الآن
-
عربي عربي
-
20 جم
-
مكتبات وسط البلد
Ahmed Abd El Gawad
العنوان لازم يأخذك ناحيته ويخليك تقف ولو لوقت قليل
تتأمل يعنى إيه “شفاء الموجوع فى أحوال دولة المخلوع”، من وجهة نظرنا هو
الكتاب اللى حاول يوصف أحوال مصر بشكل كوميدى أيام الحكم السابق وكان عاوز يضحك
الناس.. فـ ضحكوا، لكن بكى هو.
الجديد فى الكتاب هنا أن الشاعر والكاتب الساخر جمال
فتحى حاول يعمل جو تراثى للموضوع، وكأن قرن من الزمان عدى على الثورة، والكاتب ده
كأنه شاهد على حال مصر فى الوقت العصيب اللى قبل الثورة وبـ يحكى زى أيام الجاحظ والمسعودى
وعظماء الكتاب القدامى.
جمال سمى نفسه على غلاف الكتاب “أبى أحمد جمال بن فتحى
المصرى”، وبـ يهدى الكتاب لملائكة الميدان
وليالى يناير 2012 الدافئة، ولكل من كان فى قلبه مثقال ذرة من ثورة، وطبعًا واضح
من الشكل العام أن جمال فتحى ثورى حتى النخاع، ثورى بـ يرصد إيه اللى كان حاصل
أيام المخلوع فى خمس فصول تحكي لك عن مصر اللى ما تعرفهاش.
الفصل الأول بـ يكلمك عن المجتمع المصرى مش بشكل علمى، لأ،
لكن شكل جديد وواقعى بـ يكلمك عن “ندل السنين”، “السيس”،
“رمة آخر حاجة”، وباعتبارها توصيفات لازمت الإنسان المصرى وبقت جزء منه،
بـ يكلمنا عن العادات السيئة اللى انتشرت فى مجتمعنا بداية من “التناحة”
إلى السلبية “وكلمة “أنا مالى” وبـ يعتمد على المراجع الخرافية
اللى أجاد فى اختيار أسمائها زى “أشكال التناحة الحديثة” لعبد الفتاح
البارد، “المرجع فى قلة الأصل” لابن الرمة.
الفصل الثانى عن الحياة السياسية وده حدث ولا حرج فى
كمية الكوميديا اللى مش محتاجة من جمال مجهود علشان تطلع، هو بس بـ يرصد اللى كان
حاصل وأنت على طول هـ تلاقى نفسك بـ تضحك، يعنى مثلًا زى جملة مبارك المشهورة
“الكفن مالهوش جيوب” والنظام السياسى الجديد “حادى بادى”
والأغلبية الوهمية وسياسة الرقص فوق العارضة والشرح يطول لكن هـ نسيبه لكم لما تقرأوا
الكتاب.
الفصل الثالث عن الحياة الاقتصادية، عاوزينكم بس تبصوا
معانا على العناوين: “الكتكوت الإفريقى الكسيح”، “عجلاتى
التنمية”، “الموت بالقسط”.
الفصل الرابع عن الحياة الدينية وفيه بـ يرصد فتحى فساد
التعليم وانتشار الأمية وانحطاط الثقافة واللى أدى كل ده إلى تدهور الحياة الدينية
علشان ييجى “مسلمين آخر زمن” وهو عنوان المرجع اللى اختاره جمال علشان
ينقل منه حياة التدين اللى أصبحت “زبيبة” و”يونيفورم” و”أكليشيهات”.
أما آخر فصل بقى فهو عن أهم الظواهر والأحداث فـ تلاقى “عصر
الزبالة” وهو عنوان كتاب فى تخيل جمال طبعًا بـ يتكلم عن علاقة المصرى
بالزبالة على مر العصور، وفيه كلام عن قانون الفوضى و”سوسة نخرت ضهر
المحروسة” و”جمعية البنطلونات القصيرة”.
علشان يختم جمال فى الآخر بأن الثورة لما حدثت كانت حدث
ترتبي لسيناريو الفشل والظلم والفساد وبنهاية الكتاب بـ تعرف يعنى إيه شفاء
الموجوع، اقرأوا الكتاب ومنتظرين رأيكم فى التجربة.
أكتب تقييم
مقترح
الحياة في كايرو
المونوريل والقطار السريع والـLRT.. اعرف الفرق بين وسائل النقل الجديدة في القاهرة
القطار السريع القطار الكهربائي الخفيف LRT +4
فن وثقافة
