Mahmoud hafez
– ” أي حد عمره تحت الـ35 سنة بيعتبرني بطله، وأي حد فوق السن ده مايعرفنيش! “
كلمة قالها د.أحمد خالد توفيق عن نفسه مرة، لأنه اتعرف بكتابته الموجهة للشباب بالذات، الوسط المتفاعل اللي هيقرأ ويناقش ويكتب كمان، فكان جمهوره هو جيل التسعينيات من القراء اللي اتربى على مؤلفاته، لغاية ما اتلقب بالأب الروحي أو (العرّاب).
د.أحمد خالد توفيق من مواليد الغربية مدينة طنطا، حصل على الدكتوراة في الطب سنة 1997، بدأ الكتابة في أدب الرعب اللي يعتبر الرائد العربي فيه بشكل صريح لأنه أول مؤلف اتخصص في كتابته، بعدها كتب في الفانتازيا والأدب الواقعي، ترجم كتب كتير للعربية، غير مقالاته الصحفية المختلفة في أكتر من جريدة مهمة.
نقدر نقول إن د.أحمد من أهم الأصوات الثقافية في مصر حاليًا، وكتابته بتجمع بين العمق والجاذبية، أسلوب أدبي ولغة فصيحة، مع أفكار راقية وحبكات مميزة.
توفي الدكتور أحمد خالد توفيق يوم الاثنين 2 أبريل عن عمر يناهز 55 سنة بعد أزمة صحية اتعرض لها.
وهنا هنرصد أهم أعماله وإسهاماته الأدبية، مع ترشيح الأهم والأجمل منها، واللي ممكن تقرأه حتى لو مش متابع السلسلة من الأول لأن كل عدد وحدة واحدة، هنعتمد في اختيارنا على الشعبية والأراء في موقع Goodreads.
1- سلسلة ما وراء الطبيعة
السلسلة الأشهر للدكتور هي (ما وراء الطبيعة) في أدب الرعب، وبطل السلسلة رفعت إسماعيل نجاحه كان كبير جدًا، لأنه مختلف عن نوعية الأبطال الأقوياء السوبر هيروز المعتادين، بالعكس هو كان Antihero، يعني مجرد راجل عادي جدًا بيعاني من أمراض كتير، بيسخر من كل حاجة، لكنه بيقابل الأشباح والمذؤوبين وكل أشكال الرعب ويواجهم بدماغه وفكره.
أهم أعداد السلسلة:
ثنائية آخر الليل: العددين 28 و29 من السلسلة هما أفضل الأعداد بتصويت الجمهور على موقع Goodreads، وده صرّح بيه المؤلف نفسه مرة من الرسائل اللي بتوصل له، العددين بيحكوا قصة مدرس غير قادر على الإنجاب بيشوف أحلام مرعبة فيها وحش مخيف بيطارده، وكل مرة يصحى من النوم يلاقي شيء من الحلم اتنقل للواقع! ومع تدمير حياة الأستاذ النفسية والأسرية بيعرف سبب الأحلام دي وعلاقتها بمشكلته مع الخلفة.
بعد منتصف الليل (العدد 30): بيتم إستضافة رفعت إسماعيل بطل السلسلة في برنامج إذاعي هدفه الاستماع للقصص المخيفة، كل متصل يحكي قصته مع شيء مرعب شافه، والنتيجة مجموعة من الحكايات القصيرة الممتعة، بين الأشباح ولعنة الفراعنة والألغاز البوليسية، غير مكالمة غريبة جدًا في آخر الكتاب مش هنحرقها عليكم.
2- سلسلة فانتازيا
تاني سلسلة للدكتور هي فانتازيا، ومن اسمها تعتبر خيال بحت مالوش قواعد، البطلة عبير عبد الرحمن بتزور في كل عدد عالم خيالي مختلف، عن طريق آلة بتصنع الأحلام اللي نفسك فيها، في مرة بتقابل سوبر مان وطرزان، ومرة هتلر وموسوليني، بتعيش في عالم ألف ليلة وليلة، أو حتى أساطير اليونان.
أهم أعداد السلسلة:
شيء من حتى (العدد 44): شعبية العدد ده قوية فعلًا، والتصويت على goodreads خلاه في المقدمة، هنا عبير بتدخل عالم كلنا بنكرهه تقريبًا بسبب الدراسة! وهو عالم النحو وقواعد اللغة العربية، لكننا بنكتشف معاها كمية جمال وروعة رهيبة في لغتنا، خصوصًا لما تقابل فطاحل النحو زي (سيبويه) و(الخليل بن أحمد)، وتعرف إزاي العلم ده بدأ واهتمام الناس بيه زمان كان عظيم قد إيه.
حب في أغسطس (العدد 36): ماتتخدعش في الاسم، دي مش أي قصة حب معتادة، دي حصلت في هيروشيما اليابان بتاريخ أغسطس 1945!..يعني وقت سقوط القنبلة الذرية من أمريكا!!، تجربة صعبة ومؤلمة..لكنها هتحسسك ببشاعة الحرب عمومًا، وكواليس الكارثة دي اللي عمرها ما هتتنسي من ذاكرة الإنسانية.
3- سلسلة سفاراي
عمل د.أحمد كطبيب دفعه يجرب نوع أدبي جديد ع القاريء العربي، وهو (الطب التشويقي)، يعني قصص بتجمع بين الإثارة والخبرة الطبية، البطل هنا دكتور شاب بيشتغل في وحدة طبية في الكاميرون، بيواجه مشاكل القارة الصعبة من أمراض متوطنة ومستغلين أجانب وتقاليد قديمة ضد أي تقدم.
أهم أعداد السلسلة:
قصاصات (العدد 30): أهمية العدد ده أنه بيرصد تاريخ الصراع العربي الإسرائيلي بشكل مشوق جدًا، ومشاكل العرب عمومًا، عن طريق ذكريات البطل المصري وزميله الإسرائيلي، هتعرف حكايات أول مرة تسمعها عن تاريخ فلسطين، وتاريخ اليهود، مع تحليل نهائي هيدفعك للتفكير.
حكاية ثقب (العدد 29): ودي قصة مميزة جدًا في السلسلة عن الإغتراب، لما الطبيب المهاجر يحس في غربته أن روحه فيها ثقب بتتسرب منه حياته، صديقه بيموت ومراته الأجنبية أهملته، حالة صعبة كلنا بنعيشها تقريبًا، لكن في الآخر الحكاية كلها بتتفهم وسط الدموع.
4- سلسلة روايات عالمية للجيب
مختارات من القصص العالمية، الغير معروف أو مشهور منها بالذات، بيترجمها د.أحمد بحسب خبرته اللغوية والأدبية، يعني مش مجرد ترجمة حرفية، لكن الحس الأدبي مهم لأنه بينقل لك روح النص وكأنها رواية أصلية.
أهم أعداد السلسلة:
موبي ديك (عدد 52): ودي رواية أمريكية مشهورة جدًا، تقريبًا بيعتبروها أهم رواية في الأدب الأمريكي، قصة رمزية عن الإنسان وصراعه مع الطبيعة والقدر، بتحكي عن قبطان بيطارد حوت في عرض البحر، هدفه بس أنه يقتل الحوت علشان ينتقم منه! الجميل هنا أن القصة متلخصة حلو جدًا، لأن القصة الأصلية ضخمة جدًا صعبة القراءة إلا على طلاب النقد.
كارميلا (عدد 60): دراكيولا هو أشهر شخصية لمصاص دماء في التاريخ، لكن اللي كتير مايعرفهوش أن فيه شخصيات لمصاصين دماء قبل دراكيولا ويمكن أفضل منه فنيًا، زي شخصية (كارميلا) مصاصة الدماء اللي بتحكي عنها الرواية القصيرة دي، في ترجمة أمينة وسلسة فعلاً.
4- يوتوبيا (رواية)
بدأ د.أحمد كتابة الروايات المستقلة برة السلاسل، وكانت باكورة أعماله رواية (يوتوبيا) اللي اتنشرت الأول مسلسلة في جريدة الدستور، وبعد كدة اتنشرت كاملة وحققت مبيعات عالية جدًا، ووجهت الأنظار لمؤلفها كأديب تقيل في الأدب الواقعي خلاف الرعب والخيال اللي ما زالت النظرة ليهم كأنواع أقل في مجتمعنا.
رواية يوتوبيا تصنيفها واقعية مستقبلية، بتحكي عن مصر سنة 2023، واللي هيوصل فيها الحال لدرجة تتلغي فيها الطبقة الوسطى بحيث يعيش الأغنياء لوحدهم في الساحل الشمالي وباقي الدولة في حالة فقر مدقع، كمان هي من الروايات اللي تنبأت بالثورة ووصل نجاحها لأنها تترجم للأنجليزية.
5- الآن نفتح الصندوق (مجموعة قصصية)
زي أدب الرعب ما فيه روايات طويلة، فيه كمان المجموعات القصصية اللي بتضم قصص قصيرة مرعبة مركزة، وفيه إصدارات كتير للمجوعات عند الدكتور زي ( الهول، أكواريل، لست وحدك..وغيره)
(الآن نفتح الصندوق) مجموعة قصصية من 3 أجزاء، عن ظواهر غريبة ومرعبة، تقريبًا فيها كل الأفكار من النوعية دي، بتحكي قصة صندوق مقفول بنفتحه ونلاقي فيه اسرار وألغاز جذابة.
5- أفلام الحافظة الزرقاء (سينما)
يعترف د.أحمد كذا مرة أنه بيعشق السينما أكتر من أي فن تاني، وأنه اتجه للأدب من كتر حبه للفن ده، خصوصًا أهم أفلام جيله في السبعينات والتمانينات، علشان كده كتب في السينما مقالات كتير، منها اللي اتجمع في كتاب (أفلام الحافظة الزرقاء) اللي فيه ليستة من أهم أفلام الحقبة دي.
الجميل في الكتاب أنك هتعرف أفلام عظيمة أول مرة تسمع عنها، وكل فيلم في 4 صفحات بالكتير، حكاية الفيلم باختصار ونقد فني سلس ليه، مع كواليس ومعلومات لذيذة، لو بتحب السينما الكتاب ده هيحببك فيها أضعاف مضاعفة.
6- خواطر سطحية سخيفة ( تويتات)
فكرة التويتات مش جديدة، أنك تكتب خواطرك أو أفكارك البسيطة حاجة قديمة جدًا قبل موقع تويتر بقرون، عملها أدباء كتير زي (باسكال) الفرنسي و(العقاد) المصري، حتى أحمد رجب كان ليه تويتة كل يوم في الأخبار اسمها (نص كلمة).
ود. أحمد ليه أكتر من كتاب في التويتات، لكن يمكن أهمهم وأكترهم دسامة وتجميع لفكر الدكتور هو كتاب (خواطر سطحية سخيفة)، اللي بيجمع أفكاره حسب أبواب مختلفة زي الأدب، الحب، الدين، وغيره
اسم الكتاب أسلوب معروف عند المؤلف، وهو أنه بينقد نفسه بنفسه، يعني مش هيقول (خواطر عميقة عظيمة)!، الحقيقة أنه بيقول دايمًا (أنا بحذرك لو لقيت الكتاب سخيف ومعجبكش!)، وعشان كدة دايمًا عناوينه كدة ( ضحكات كئيبة، قصاصات قابلة للحرق، الغث من القول) !
7- دماغي كدة (مقالات)
زي ما قولنا، للدكتور مقالات في جرايد كتير، منها السياسي والفني والأدبي أو حتى حياتنا العامة، المقالات دي كالعادة بتتجمع في كتب عشان تتحفظ كتجميعة وفكر متأرخ لصاحبها.
ومن أهم الكتب دي (دماغي كدة)، وفعلًا الكتاب اسم على مسمى، لأنه بيعرض دماغ وفكر الدكتور في كل الأنواع تقريبًا، سياسة وفن وذكريات وعلم مزيف، الكتاب ده خير بداية لكتب مقالات الدكتور، وبعدها تكمل باقي الكتب زي ( الغث من القول، شاي بالنعناع، شربة الحاج داوود..إلى آخره)
8- اللغز وراء السطور (عن الكتابة)
أي كاتب ناجح، بيحكي تجربته مع الكتابة طول مشواره، ود.أحمد زي أدباء كتير خصص كتير من مقالاته للأدب بس، فجمعها في الكتاب ده، اللي فعلًا يعتبر مرجع لكل قاريء غاوي أدب، ونفس الوقت اللي بيحب كتابات الدكتور.
إيه أنواع الأدب المختلفة؟ إزاي الكاتب بيلاقي الأفكار؟ إمتى نسمع صوت النقد وإمتى لأ؟ إيه مشكلة المسرح مع الجمهور؟ كل ده بأسلوب شيق بعيد عن أي تعقيد فني أو أكاديمي، المؤلف تقريبًا قاعد معاك على القهوة وبيحكيلك ببساطة!
وداعًا احمد خالد توفيق
مقترح
معالم وسياحة
زاوية أيدكين: حكاية أول خانقاه مملوكية في قلب القاهرة
اثار مملوكية في مصر خانقاه في القاهرة +2
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
