The Definitive Guide to Living in the Capital , Cairo , Egypt

يا ترى لما نقول لك يلا بينا نروح مكان على النيل، إيه اول صورة بـ تيجي في بالك؟

مكان مريح منظر جميل وأكل شهي وخدمة ممتازة، زي الـPuzzle  كده لو قطعة وقعت الصورة مش هـ تكمل ومش هـ يبقى لها معنى. وده اللي حصل معانا في فولوز كافيه – volo’s cafe.

للأسف بـ يبقى صعب علينا أننا نقول عن مكان أنه وحش بالذات لو فاتح جديد، المكان فاتح في Blue Blue في المنيل على النيل، وشكله حلو، بـ تستقبلك موظفة الاستقبال على الباب بابتسامة جميلة، وتقعد على ترابيزة وتطلب أول طلب، بس خلاص.. خرجت من حساباتهم.. طب حضرتك عاوزين نطلب ثاني.. طب إحنا طلبنا فيه مشكلة.. طب إحنا عاوزين عصير.. بالضبط بـ تكون عامل زي ما تكون بـ تغرق في النيل وعمال تشاور لو سمحت.. من فضلك.. يا أستاذ.. وبالتأكيد إحنا غرقنا، أو تروح بـ نفسك للمطبخ اللي كان مفتوح بالمناسبة، فأنت بـ تتفرج على الشيف وهو بـ يعمل لك الأكل.. المهم هـ تفضل تغرق كده، ومش مشكلة لو أنت جعان أو عطشان، لحد ما حد يشوفك ويحن عليك وييجي يشوفك عاوز إيه؟ وده ليه؟ لأن المكان كبير ومليان ناس وعدد الجرسونات قليل جدًا، برغم أنك تحس من تعاملهم أن فيه حد فوق دماغهم ممليهم التعليمات وهم بـ يسمعوها من غير تفكير، ما ينفعش ترابيزة ما ينزلش عليها مياه، طب مش عاوزين حضرتك، معلش خليها هنا.. الطبق خلص، لازم نشيله يا فندم.. طب لسه ما خلصناهوش.. تمام يا فندم، وده كان في الأول قبل ما المكان يتملى ويسيبونا للطوفان.

طلبنا في الأولfried Mozzarella  بـ 27 جنيه، والحقيقة أنها كانت حلوة جدًا، بس ناقصها تتبيلة بقسماط أقوى علشان كانت بـ تسيح من كل حتة والمفروض تبقى متماسكة أكثر من كده وبرغم أنها بـ تُقدم مع 2 صوص زي ما مكتوب في المنيو إلا أنهم جابو لنا واحد بس Honey mustard وما جابوش الـbarbeque .

ولأننا كنا أكثر من فرد فطلبنا أكثر من حاجة ودي كانت فرصة كويسة علشان التقييم يبقى شامل، فطلبنا pizza Hot Mexican بـ 48 جنيه، كانت عادية والعجينة رفيعة بس مش حارة خالص بعكس المكتوب. كمان طلبنا Pesto Pasta بـ 43 جنيه ودي عبارة عن مكرونة بصوص الكريمة بالريحان والتوم، والحقيقة أن كميتها كانت كبيرة وغنية وتعتبر الحاجة الوحيدة اللي عجبتنا، كمان طلبنا Carbonara pasta بـ 46 جنيه، ودي كانت مكرونة بالفراخ واللحم المقدد وصوص الكريمة المخلوط بالبيض، هي كانت لذيذة وما حسيناش بطعم البيض بس اللحم المقدد ما كانش إضافة ذكية.

أما بقى خيبة الأمل الكبيرة، كانت فيFried chicken Blue  بـ 58 جنيه، واللي المفروض أنها فراخ مقلية جواها موتزاريلا ولحم مقدد أو مشوي زي ما كاتبين في المنيو وعليها صوص، بغض النظر أن الصوص كان مزود حميان طعم الفراخ المحمرة، ما عثرناش على اللحم المقدد بالداخل مطلقًا، والمضحك بقى أننا بعد معاناة لما لقينا جرسون معدي نقول له بعد أكل نصف الطبق لأننا كنا جعانين، قال لنا بمنتهى البساطة طب يا فندم ما استنتوش ليه قبل ما تأكلهم، ولما توريه للشيف يقول أنا حطيته طبعًا، والقطعة اللي أمامك طيب، طب إحنا هـ نكذب عليك ليه أنك ما حطيتهاش، مش ده اللي هـ يخلينا ما ندفعش ثمنها، بس الواضح أن الشيف مش بـ يقبل النقد، والجرسون بعد ما حاول يسترضينا وعرض أنه ينزل حاجة مكانها، رجع في كلامه تقريبًا ولا كأنه يعرفنا.

المهم قلنا نكمل التجربة لآخرها ونطلب الحلو، طلبنا Molten بالآيس كريم بـ 25 جنيه، كان سخن ولذيذ ومناسب لجو الكافيه، كمان جربنا كمشروباتSmoothies Kiwi Peach  بـ 24 جنيه، وكان حلو وجديد، و77 Sun Strip اللي هي عبارة عن صوص Cherry وسفن آب وليمون وده اعتراف مننا بأن صوص الشيري اللي هو جاهز أصلا مش بـ يعملوه كان أسوأ صوص نذوقه في حياتنا، لأنه كان متكتل ومش بـ يدوب، كثير لدرجة أنه بـ يطلع معاك في الشاليموه وبـ يعذبك حرفيًا بجرعته المكثفة.

الحقيقة أن برغم أن الكافيه من كثرة الاختيارات والتنوع في المنيو بتاعه ما ينفعش نطلق عليه اللقب ده، المفروض يبقى مطعم أو Lounge لكن هو مكان مناسب لو هـ تروح تقعد اليوم كله بالضبط لحد ما يلحقوا يخلصوا الطلبات ويشوفوا أنك محتاج حاجة ثانية فـ ييجوا لك، أحسن لك تكتفي بالعصير وتعتبره كافيه، وانسى فكرة الأكل. نتمنى أنهم يزودوا عدد الجرسونات ويهتموا بزباينهم وتعليقاتهم أكثر من كده المرة الجاية.