The Definitive Guide to Living in the Capital , Cairo , Egypt

صحيح القاهرة عمرانة بالمخابز ومحلات الحلويات، لكن بشكل عام فيه مشكلة في طريقة تنفيذ حاجات معينة منها الدوناتس والكرواسون وحلويات ثانية، لو نويت ونفسك راحت على قطعة دوناتس حلوة دلوقت حالًا، مش هـ تلاقي أمامك إلا كام مكان يتعدوا على الأصابع، مع الأسف الشديد الدوناتس مش من الحلويات المفضلة لسكان القاهرة.

الدوناتس هي كلمة ورد غطاها؛ إما عجينة وآيسينج أو عجينة وحشو أو عجينة وطبقة صوص. الموضوع سهل وبسيط مش كده؟

بيج بايتس ظهر فجأة في شارع 233، وفاجئنا بتشكيلة ضخمة من الدوناتس والكيكات والرولز والكوكيز والبراونيز والمافينز. المكان مساحته صغيرة باللون الأصفر الفاتح، مع كام كرسي وترابيزة خشب ومكان لعرض لمنتجاتهم، وأول ما تدخل من الباب الزجاجي بـ يرحب بك الموظف ويشرح لك النكهات الموجودة.

طلبنا ثلاث قطع دوناتس محشية: بلو بيري أند كريم تشيز (13 جنيه) وآبل أند سينامون (13 جنيه) وستروبيري جام (13 جنيه)، مع وولنت براوني (12 جنيه) وسينامون رول (20 جنيه) ودونات عادية بالشوكولاتة البيضاء والكراميل (10 جنيه).

خلينا نبدأ مع حاجة لطيفة، براوني بعين الجمل كانت لذيذة وحجمها كبير، والحلو أن عين الجمل مش طاغي على الطعم وكمان قدر يعمل ميكس ممتاز مع الشوكولاتة، المشكلة أن الدونات نفسها كانت سيئة، وصحيح الحشو كان هائل مافيش كلام، بس المشكلة أن العجينة مالهاش أي علاقة بطعم الدوناتس وكانت أقرب لكيكة، وكيكة مش طازجة حتى، اوعى تفتكر أن دي أكبر مشكلة قابلتنا، المشكلة بجد إزاي طعمها مسكّر بالشكل ده، مع ثالث قضمة، كل حاجة تحوّلت لسكر.

نروح على السينامون رول الغرقانة في آيسينج طعمه غريب لا هو قرفة ولا حتى قريب من بودرة القرفة، وعجينتها كانت نفس عجينة الدوناتس، وبكده يكون الموضوع كله ضعيف.

يمكن اليوم ما كانش يومهم أو يمكن الحلويات يومها كانت مش طازجة، في كل الأحوال كل اختياراتنا كانت مسكّرة بزيادة وطعمها مش لطيف خالص.