The Definitive Guide to Living in the Capital , Cairo , Egypt

رنا شرف

مافيش أجمل من إفطار في مكان جميل وسط تشكيلة حلوة من المخبوزات الطازجة. مؤخرًا قررنا نجرب محل للمخبوزات والحلويات له شعبية كبيرة في منطقة الكوربة، وهو بوشيه – Bouchee، استمتعنا هناك بالكرواسون مع قهوتنا المفضلة.. التفاصيل؟ هنقول لكم عليها في السطور الجاية.

أول ما هتدخل المكان هتلاحظ بعض الزحمة، وهتكتشف إن المكان متقسم لجزء إن دور  وجزء أوت دور، الداخلي مافيش فيه تدخين، لكن الخارجي للمدخنين.

اخترنا المكان الداخلي، خصوصًا وإنه شيك والديكورات هتحسسك إنك في فرنسا واللوحات فيه جميلة ومكتوب عليها كلام عن المكان.

طلبنا كرواسون سادة سعره كان 50 جنيه، الكرواسون حقيقي كان حلو ومعمول زى الكتاب مابيقول؛ مورق وهش وطعم الزبدة باين فيه.

طلبنا كمان كابتشينو بسعر 26 جنيه، كان معقول، لكن مش مميز لدرجة تخلينا نحس إنه مختلف.

القعدة عجبتنا وطولنا شوية في المكان، وطلبنا ساندوتش تركي مع جبنة، وسعره كان 38 جنيه، كان حلو جدًا والخبز كان معمول فريش والتركي طعمه كان مميز، الساندوتش في المجمل كان عظيم!

المكان حلو، وقعدته مريحة، وأكيد هنجربه تاني.

بوشيه موجود في شارع بغداد، الكوربة، مصر الجديدة، وتقدروا تطلبوا منه من اللينك ده ويوصل لكم لحد البيت.