لعشاق الشعر والأغاني.. فوكس والإكسلانس في بيت السناري
أندر جراوند إسلام منسي بيت السناري حفلات في القاهرة فوكس والإكسلانس مشروع الميكروفون
Cairo 360
سعيد محمود
الصورة الرئيسية من صفحة “ميكروفون“
لما توفى شاعرنا الكبير سيد حجاب ومن قبله الخال عبد الرحمن الأبنودي، كتير قالوا إن مجال الشعر في مصر مش هيطلع مبدعين تاني بعد فقدان الجيل القديم، لكن لأن مصر معودانا دايمًا إنها ولاَّدة، وفي كل عصر بتبهرنا بمواهب ولادها في مختلف المجالات، ظهر للنور شعراء شباب مبدعين يفرحوا القلب، منهم العفريت اللي لابس بدلة إنسان الشاعر ضياء الرحمن، أو زي ما بيحب يسمي نفسه “الإكسلانس”.
ضياء من الأسماء المعروفة بين فرق “الأندرجراوند” زي “ليل وعين” و”سلالم”، وطبعًا “بلاك تيما” اللي غنوا له أغنية “إنسان” الشهيرة.
ومن المواهب المبهجة اللي محققة نجاح كبير بين الشباب هو المطرب أحمد فوكس، اللي بيعمل عن طريق فن “الأكابيلا” -وهو الغناء بدون موسيقى- حالة غريبة بتاخد الجمهور لعالم ممتع زي ما بيوصفه معظم الشباب اللي بيحضروا حفلاته وبيتابعوه على السوشيال ميديا.
لو حابب تتعرف أكتر على فوكس والإكسلانس وتسمعهم لايف، تقدر تروح بيت السناري يوم الخميس 15 ديسمبر الساعة 6 مساء وتحضر حفلتهم مجانًا، وتستمتع بجو بيت السناري الساحر وإنت بتسمعهم.
زي ما قلنا لك الحفلة مجانية، وبينظمها مشروع “ميكروفون” بإشراف مؤسسه إسلام منسي اللي بينظم بشكل دوري أكتر من “إيفنت” مشابه بيجمع فيه كل الموهوبين في الشعر والغناء وفن الحكي عشان يعرضوا مواهبهم للجمهور.
بيت السناري مكانه في ميدان السيدة زينب، وقريب من سوبيا الرحمان وكبابجي الرفاعي، ودول من أشهر الحاجات في السيدة زينب، وتقدر تروح له من مترو سعد زغلول، وتتمشى للمكان بعد ما تسأل على سوبيا الرحماني، وأول ما توصل للرحماني هتسأل على بيت السناري ومش هتاخد دقيقة وتوصل.
