The Definitive Guide to Living in the Capital , Cairo , Egypt

فرقة «وسط البلد» قررت تعمل لنفسها ستوديو ويكون مكان للبروﭭـات والتسجيل الخاص
بيهم، وفي نفس الوقت سمحت أنه أي فريق أو مازيكاتي يعمل بروﭭـاته هناك مقابل 25
جنيه في الساعة.

المكان سهل الوصول ليه من كل حتة لأنه قريب من محطة مترو أنفاق «سعد زغلول»
في شارع جانبي متفرع من شارع «القصر العيني» اسمه شارع «صفية زغلول»، والشارع هادي
وممكن تلاقي ركنات بـ سهولة لو معاك عربية.

الإستوديو عبارة عن شقة في دور أرضي ليها مَنزَل كام سلمة وباب إزاز على
الشارع مباشرة. هـ تدخل من الباب تلاقي مكتب الحجوزات في الوش، هـ تمشي في طرقة
طويلة على اليمين بـ تودي على صالة إنتظار فيها كمبيوتر مشغَّل مزيكا طول الوقت،
وعلى الشمال في أوضتين، واحدة للبروﭭـات والتانية للتسجيل.

في صالة الإنتظارالديكور ظريف جداً بالكراسي البامبو والطبول اللي في كل
الأركان، والسقف عبارة عن بوسترات وصفحات من مجلات موسيقى عالمية زي «Total
Guitar» و«kerrang» و«Rolling Stones» ملزوقة بشكل عشوائي،
والحمام كمان فيه نفس البوسترات.

أوضة البروفات مساحتها مش كبيرة، متبطنة باللون الأزرق الغامق وتوزيع السماعات والأمبلفايرز فيها إحترافي جداً بحيث تسمع أحسن صوت ممكن
في كل أجزاء الأوضة، فيه درامز «تاما – Tama» عليه نحاسات «زيلدﭼن –
Zildjian»، صوتها كويس وحالتها
كويسة، وفي سماعتين «ياماها – Yamaha» في أول الاوضة وآخرها صوتهم نقي بس مش قوي كفاية وفي أمبلفاير للباص جيتار نوعه «لاين 6 – Line
6» محتاج شوية تظبيط عشان يطلع صوت
كويس، ومفيش أمبلفاير للإليكتريك جيتار “Lead Guitar” لأنه بـ يتوصل على الميكسر زي الميكروفونات،
الميكسر كمان « Yamaha» فيه 12 مكان للتوصيل
“12 Channels
Mixer” وحالته ممتازة مش زي
ستوديوهات بروﭭـات تانية، وبـ شكل عام المعدات كلها جديدة وأصلية وحالتها ممتازة.

أوضة التسجيل ليها معداتها الخاصة بيها زي الميكسر والميكروفونات وفلاتر
الصوت والحجز بـ 150 جنيه الساعة وبـ يكون معاك مهندس الصوت المتخصص وممكن يساعدك
في التوزيع لو معاك مزيكا محتاجة آلات تانية وتوزيع موسيقي.

مفيش تأجير آلات موسيقية ولازم كل حد يجيب أدواته معاه، دي سياسة المكان
رغم أن الإستوديو مليان آلات إيقاع وجيتارات خاصة بفرقة «وسط البلد» بس طبعاً ليهم
مطلق الحرية أنها تبقى للإستخدام الشخصي بس. أرقام تليفون الحجز بـ تتغير كتير
وممكن يحصل لخبطة في الحجز، بس المعاملة ممتازة فحتى لو ده حصل هـ يتم حل
المشكلة فوراً أو التعويض المناسب.

في بوفيه ممكن تشرب فيه شاي أو نسكافيه ومشروبات دافية تانية بأسعار بسيطة
بس ممنوع تدخل بيها أوضة البروﭭـات.

عشان أصحاب الإستوديو أصلاً موسيقيين محترفين وعاملين المكان قبل أي حاجة
للإستخدام الشخصي؛ هـ تلاقي الجو العام هادي ومنظم ويساعد على أنك تعمل بروﭭـة
كويسة ومنتجة.