The Definitive Guide to Living in the Capital , Cairo , Egypt

كل يوم بقى فيه حفلة أو عرض في منطقة ما في القاهرة؛ وده لأن أماكن كثير بقيت مجهزة لاستضافة الفرق المعاصرة سواء الموسيقية أو المسرحية، وبما أن عدد الأماكن دي بيزيد يوم بعد الثاني، بدأنا شخصيًا نحس أن عددها أكبر من عدد الفنانين اللي بيقدموا حفلات فيها؛ بمعنى أنك لو فوّت حفلة الفنان الفلانى النهارده في المكان الفلاني، ممكن تلحق حفلته بكرة في مكان ثاني وهكذا، غالبًا كل الأماكن بتقدم نفس الحاجة.

هنا تيجي أول ميزة لمجموعة الأماكن اللي موجودة في المقال ده، وهي اختلاف طبيعة عروضها عن أي مكان ثاني؛ لأن المجموعة مهمتها الأساسية هو تقديم لون مختلف من الفنون وهي الفنون التراثية بأنواعها بهدف الحفاظ عليها وتعريف الآخر بها.

مكان – Makan:

أو المركز المصري للثقافة والفنون، وهدفه الأساسي الحفاظ على هوية الشعوب -في زمن قربت الأذواق تبقى موحدة- عن طريق تقديم الفنون التراثية اللي بتتنقل لكل جيل شفهيًا. مش بس بيستضيف فنانين مصريين، مكان بين كل فترة والثانية بيقدم للجمهور فنانين من دول العالم المختلفة.

بواقع 3 حفلات في الأسبوع (اثنين، ثلاثاء وأربعاء) مكان بيقدم حفلات ثابتة: زي حفلات الذكر الصوفي والإنشاد كل يوم اثنين واللي بيستضيفوا فيه كل حفلة منشد مختلف، أما الثلاثاء فهو حفلة الزار المصري واللي بتقدمه فرقة "مزاهر" بشكل ثابت كل يوم أربعاء، حفلات يوم الثلاثاء بتبقى بتختلف كل أسبوع ولكن عادة مش بتخرج عن فن الموال اللي بتقدمه رضا شيحة، موسيقى صعيد مصر لفرقة "الجعافرة" أو فرقة "أراجيد" النوبية.

كل فترة بيقام حفل "ناس مكان" وهو بيضم كل الأسماء دي في حفل واحد، وأحيانًا بيقدموا فرق معاصرة بتحاكي الموسيقى التراثية زي مشروع NAR وفرقة "هوس" على سبيل المثال، سعر التذكرة ثابت في جميع الأحوال وهو 30 جنيه.

دي صفحة الفيسبوك الخاصة بمكان، وده موقعهم الإلكتروني.

مسرح الضمة – El Damma Theatre:

مسرح الضمة تابع لمركز المصطبة للموسيقى الشعبية المصرية مهتم بالفن المصري وخصوصًا موسيقى منطقة العريش، والسويس وبورسعيد، الاهتمام مش بس عن طريق تعريف أهل القاهرة بموسيقى المناطق دي، المركز مؤسس في الثلاث مناطق مدرسة لنقل التراث الموسيقي للجيل الجديد، من أهم الفرق اللي قدمها لجمهور القاهرة فرقة "الطنبورة البورسعيدية"، فرقة "الجركن البدوية" و"الوزيري" (الصحبجية سابقًا) من الإسماعيلية.  

ده ما يمنعش أن المركز بيقدم فرق من مناطق ثانية زي "نوبا نور" من النوبة وفرقة "مزامير النيل".

أغلب الحفلات بتكون يوم الخميس وسعر التذكرة 30 جنيه، وده موقعهم وصفحتهم على الفيسبوك.

وكالة الغوري:

بناها الأشرف أبو النصر قنصوة الغوري في العصر المملوكي، ومر عليها الزمن لغاية ما بقيت مركز ثقافي تابع لصندوق التنمية الثقافية سنة 2005، بجانب عدد كبير من الخدمات اللي بيقدمها المركز، كل سبت واثنين وأربعاء فرقة التنورة التراثية بتقدم حفل الساعة 7 مساءً هناك وهي من الحفلات اللي لها صدى كبير عند ناس كثير.

والتنورة من الرقصات التراثية اللي مرتبطة بالصوفية، واللي بتتميز بحركات دائرية متنوعة لكل حركة دلالتها الخاصة بها، بالإضافة لجمال الموسيقى الروحية المصاحبة لها.

سعر التذكرة 5 جنيه للمصريين، و30 جنيه للأجانب. لو عاوز تعرف أكثر دوس هنا.

بيت السحيمي:

من أجمل البيوت الأثرية الموجودة في مصر وخصوصًا أنه بيطل على واحد من أعرق الشوارع وأشهرها في مصر وهو شارع المعز، بالبيت اللي حمل اسم آخر ساكن فيه وهو الشيخ أمين السحيمي وتم إعادة افتتاحه سنة 2000، وبيقام فيه فعاليات فنية كثيرة من ضمنها عرض خيال الظل والأراجوز، وهو من الفنون المصرية الأصيلة، العرض بتقدمه فرقة "ومضة" واللي كل فترة بتجدد في موضوعات العرض الخاصة بها من غير ما يخرجوا عن إطار القصص التراثية المصرية.

العرض بيقام كل يوم جمعة الساعة 7 مساءً، والدعوة عامة، دي صفحته على الفيسبوك.

مركز الربع الثقافي:

مركز الربع الثقافي يختلف نوعًا ما عن المجموعة اللي فاتت لأنه مش متخصص في الفنون التراثية بس، ولكن اللي دخله في القائمة هو أنه بيقدم كل فترة والثانية حفلة لفرقة الإنشاد الصوفي والموسيقى الروحية "الحضرة".

الفرقة حققت نجاح كبير وبتتميز بأدائها الممتاز لمجموعة من أشهر القصائد اللي كتبها شيوخ الطرق الصوفية في مدح الرسول وأهل بيته. سعر تذكرة آخر حفلة لهم كان 30 جنيه، وتقدر تعرف أقرب حفلة للفرقة في الربع من هنا.