The Definitive Guide to Living in the Capital , Cairo , Egypt

الصورة الرئيسية: Eman Ali

لو بتخطط تزور معرض القاهرة الدولي للكتاب 2025، فالموسم بدأ خلاص! الدورة الـ56 هتكون في مركز مصر للمعارض الدولية بالتجمع الخامس، تحت شعار “اقرأ.. في البدء كان الكلمة”. سواء عايز تعرف المواعيد، أسعار التذاكر، أو حتى إزاي توصل، كل التفاصيل هتلاقيها في السطور الجاية.

مواعيد معرض الكتاب 2025

من 24 يناير لحد 5 فبراير. والأبواب هتكون مفتوحة للجمهور من الساعة 10 صباحًا لـ8 مساءً، ماعدا الخميس والجمعة لحد 9 مساءً.

سعر التذكرة وطريقة الحجز

• سعر التذكرة للدخول 5  جنيه بس.
• تقدر تحجزها أونلاين بسهولة من الموقع الرسمي (اضغط هنا).

معرض الكتاب 2025: ناشرين من 80 دولة وفعاليات لكل الأذواق

الدورة الجديدة من معرض القاهرة الدولي للكتاب 2025 هتكون نقلة كبيرة! المرة دي هتلاقوا حوالي 1345 دار نشر من 80 دولة من كل حتة في العالم، وهيشارك في المعرض 6150 عارض!

ووزارة الثقافة كشفت عن خريطة المعرض السنة دي واللي هتكون في 5 صالات كبيرة. الناشرين اتحدد أماكنهم بقرعة علنية في هيئة الكتاب، والتجهيزات شغالة على قدم وساق عشان الأجنحة تكون جاهزة تمام قبل المعرض بيومين أو تلاتة.

اعرفوا الخريطة الكاملة لأماكن دور النشر من هنا.

برنامج ثقافي غني ومتنوع

السنة دي المعرض مش بس للكتب، ده كمان عامل 600 فعالية متنوعة!

• ندوات أدبية مع كبار الكتاب.
• حورات فكرية بتناقش قضايا ملهمة.
• عروض فنية مميزة بمشاركة مبدعين من مصر ومن برة.

المواصلات: إزاي توصل بسهولة؟

محافظة القاهرة موفرة 7 خطوط أتوبيسات مباشرة من ميادين مختلفة:

الخط الأول: عبدالمنعم رياض – رمسيس – العباسية – جامعة الأزهر – محور المشير – معرض الكتاب.

الخط الثاني: دوران شبرا – أحمد حلمي – رمسيس – العباسية – نادي السكة – جامعة الأزهر – محور المشير – معرض الكتاب.

الخط الثالث: النزهة الجديدة – ميدان الحجاز – السبع عمارات – مكرم عبيد – مصطفى النحاس – الوفاء والأمل – معرض الكتاب.

الخط الرابع: الأميرية – ميدان المطرية – الحلمية – كلية البنات – ميدان الشهيد هشام بركات – الحي السابع – حي السفارات – معرض الكتاب.

الخط الخامس: ميدان الجيزة – جامعة القاهرة – القصر العيني – السيدة عائشة – الأتوستراد – جامعة الأزهر – معرض الكتاب.

الخط السادس: صقر قريش – كارفور المعادي – نادي وادي دجلة – الطريق الدائري – محور المشير – معرض الكتاب.

الخط السابع: المظلات – سراي القبة – روكسي – السبع عمارات – الحي الثامن – الوفاء والأمل – محور المشير – معرض الكتاب.

نصائح مهمة:

لو عايز تزور المعرض من غير زحمة أو توتر، اختار يوم في نص الأسبوع واستمتع بالكتب والمعروضات براحتك، واختار لبس مريح وحذاء طبي علشان متتعبش من المشي الكتير بين قاعات العرض، وتابع الطقس قبل ما تروح وشوف لو محتاج تأخذ شمسية صغيرة معاك، واوعى تنسى يكون معاك زجاجة مياه.