تكية مسافر.. 3 سنوات من الإبداع في الدرب الأحمر
آثار الدرب الأحمر أفضل المراكز الثقافية أماكن ثقافية في القاهرة الدرب الأحمر تكية مسافر عنوان مركز تكية مسافر مراكز ثقافية في مصر مركز ثقافي![تكية مسافر.. 3 سنوات من الإبداع في الدرب الأحمر](https://assets.cairo360.com/app/uploads/2024/02/06/FotoJet-875x323.jpg)
Mohamed Talaat
زمان كانت منطقة الدرب الأحمر مش أي حد بيروحها علشان كانت من المناطق اللي ماحدش يعرفها كويس رغم أن فيها مباني تاريخية عظيمة ومميزة وأشهرها مسجد الرفاعي ومسجد السلطان حسن، ولكن من 3 سنين حصل اللي غير ملامح المنطقة بالكامل وقصة كفاح بدأت مع تأسيس “تكية مسافر”، أول مركز ثقافي حقيقي في المنطقة. تعالوا نسافر بالزمن لمكان عمره أكثر من 170 سنة قرر مجموعة من الشباب المغامرين تعميره من 3 سنوات وحولوه لحلم جميل اسمه تكية مسافر!
البداية كانت لما “ندى” اللي بالمناسبة واخدة دكتوراه في مكافحة النمل الأبيض من اليابان كانت بتتمشى في منطقة الدرب الأحمر، ولفت نظرها يافطة مكتوب عليها “للبيع”، وانبهرت بالمبنى القديم اللي له 177 سنة، واتواصلت مع صديقتها ورفيقة الدرب “شيماء” المترجمة بوزارة العدل، والإثنين كان عندهم إنبهار بالمكان اللي شافوا فيه اللي ماحدش قدر يلاحظه في شقة مقفولة لها 15 سنة، وقرروا يحلموا بتحويل الشقة القديمة دي لمركز ثقافي مختلف، وقبلوا التحدي خاصة وهن من عشاق القاهرة التاريخية، وبدأت حكاية ظهور “تكية مسافر”.
الشهر ده تكية مسافر بتحتفل بـ3 سنوات من الندوات والورش والثقافة والرحلات وغيرها من الفاعليات المميزة اللي قدموها لجمهورهم، وقصة كفاح التكية ماكنتش مجرد مشروع ونجح وخلاص، بالعكس هو كان فيه مجهود كبير بداية من الشقة اللي رغم أثريتها إلا أنها كان فيها مشاكل كتير اتحلت كلها عن طريق مثابرة ومجهود “بنتين من مصر” لحد ما أصبح قبلة للمصريين والأجانب، علشان يستمتعوا بإفطار كل جمعة، ومعرض الحرف اليدوية أول كل شهر، وندوات ومناقشات ودورات الرسم والحرف اليدوية وجلسات الحكي، مع مكتبة متميزة فيها كتب في شتى المجالات بمختلف اللغات وفيها جزء مخصص للأطفال، مع قاعة عم حربي اللي من أقدم بائعي الكتب في سور الأزبكية.
التكية كمان بتساعد مبدعي المنتجات المصرية بعرض منتجاتهم في أماكن مخصصة وكل المنتجات مصنعة في سيوة وكاترين وغيرها من الأماكن المهمة والمعروف عنها إنتاج حرف يدوية ومنتجات طبيعية، ده غير مساحة عمل مشتركة للشغل والمذاكرة وقعدات ونس وحكي، وهما مشهورين جدًا أنهم أصدقاء للحيوانات الأليفة وفي الحقيقة لو أنتم عندكم فوبيا من الكلاب لازم تروحوا تزوروا جمال وجميل أشهر كلبين في مصر واللي هيستقبلوكم بفرحة غير طبيعية وهيفهموكم إزاي تغيروا رأيكم بشكل مبهر.
التكية تمت 3 سنين من العطاء في الثقافة والفنون والحكي والترحال وكانت مصدر للبهجة والفرحة وزارها كتير من المشاهير من كل الأوساط الأدبية والثقافية والفنية، ولسه مكملين..!
تروحوا تكية مسافر إزاي؟
علشان توصلوا لتكية مسافر تقدروا تركبوا أي أتوبيس بيعدي على منطقة الدرب الأحمر أو السيدة عائشة وأطلبوا منه ينزلوكم عند مسجد السلطان حسن، هتلاقوا المكان واضح أمامكم أو تركبوا مترو لمحطة سعد زغلول ومن هناك عربية للسيدة عائشة علشان هما موجودين في 27 ممر 29 ميدان الرفاعي – الدرب الأحمر.
تقدروا تعرفوا أكثر عنهم من خلال صفحة الفيسبوك من هنا.