The Definitive Guide to Living in the Capital , Cairo , Egypt

لو كنتم من عشاق محافظة الإسكندرية وبحرها الجميل ومبانيها القديمة، عندكم فرصة تستمتعوا بجمالها زمان من خلال معرض فن تشكيلي للفنان المصري الموهوب “ياسر جعيصة”. هيستضيفه جاليري النيل بالزمالك، من يوم الأحد 6 ديسمبر، ولحد 19 ديسمبر 2020، بعنوان “إسكندرية زمان”.

كايرو 360 التقى الفنان ياسر جعيصة، وعرفنا منه معلومات عن المعرض، تعالوا نعرفها مع بعض:

في معرض “إسكندرية زمان” بيحول الفنان ياسر جعيصة الماضي لصور قديمة بالأبيض والأسود، وبيشرح جعيصة إن ذكرياتنا دائمًا بتكون عايشة معانا، وكل شخص مننا متعلق بالماضي وحكاياته وصوره، وحتى لو ماعيشناش الماضي بنفسنا فأكيد بيكون جوانا حنين داخلي له.

وقرر جعيصة تحويل الذكريات والحكايات لواقع ملموس، وده برسم حياة تدب فيها الروح بصورة حديثة، من خلالها نقدر نتخيل حكايات مختلفة تخلينا وكأننا زرنا كل الأماكن اللي هو رسمها بريشته، وبالفعل نجح جعيصة يحول المباني والشوارع لحكايات، وكمان السيارات القديمة اللي كانت بتجوب الشوارع وبتحمل داخلها ذكريات سعيدة.

والفنان التشكيلي المصري الحاصل على جوائز عديدة، نجح في إنه يحول الصور والحكايات لواقع ملموس بصور حديثة ملونة، بعد ما شاف مئات الصور عن الإسكندرية، وقرر بعدها أنه يرسم شوارع الإسكندرية، علشان يعيد شوارعها القديمة للحياة مرة تانية، ويحكي حكاياته معاها، بـ65 لوحة بالألوان الزيتية اللي بتضيف البهجة للوحات، مع الحفاظ على طابع الحداثة لإظهار الحياة المبهجة اللي عايشة جوانا.