The Definitive Guide to Living in the Capital , Cairo , Egypt

فندق إنتركونتيننتال سيتى ستارز هـ يستضيف “معرض
الجمال والرشاقة الدولى” فى دورته الخامسة من بكره 14 إلى 16 أكتوبر فى قاعة
السرايا، المعرض بـ يفتح أبوابه لكل اللى عاوز يتعرف على أسرار جمال: الجسم، الشعر،
الوجه، الأسنان، وكمان اللى يحب يتعرف على أسرار الرشاقة واللياقة البدنية.

أسرار الجمال الموجودة فى المعرض مختلفة باختلاف
الجنسيات المشاركة، فيه 14 دولة فى المهرجان، فمثلاً بـ تشارك شركة زيران الكندية
فى المهرجان بعرضها لمنتج الكيراتين الطبيعى المكون من أعشاب طبيعية بـ تفرد وتنعم
الشعر، وكمان شركة مستحضرات تجميل تركية.

المعرض بـ يوفر لزواره فرصة مقابلة مندوبين شركات
التجميل والزيوت العطرية والبرفانات العالمية، وكمان شراء مجلات التجميل والموضة
العالمية، وحجز كورسات التجميل والتصفيف فى الأكاديميات المتخصصة، ومعرفة الجديد
فى صبغات وتسريحات الشعر، وشراء معدات التجميل وإكسسوارات الشعر، والمكملات
الغذائية، ومستحضرات العناية بالشعر والبشرة،  وحضور محاضرات عن التغذية والعناية بالبشرة
ودروس الماكياج، ومقابلة خبراء فى جراحات التجميل والأسنان.

كمان المعرض بـ يوفر إمكانية توقيع اتفاقيات للتوزيع
والتبادل والتسويق مع شركات التجميل، مش بس كده، زوار المعرض بـ يتعرفوا برضه على
أسعار الكوافيرات للعرائس فى المناطق المختلفة ولفات الطرح، وأسعار مصورى الأفراح،
وخدمات مصممي ديكور الأفراح، وأكاديمية تعليم الرقص، وخدمات منظمى الحفلات.

أظرف حاجة فى معرض الجمال والرشاقة أنه بـ يقدم جلسات
حية عن كيفية تصفيف الشعر وصبغه، عروض لأحدث قصات الشعر، ندوات عن فنون وضع
الماكياج، والسنة دى الماكيير العالمى فيليب علوش هـ يبقى موجود، كمان ممكن زائرات
المعرض يعملوا باديكير ومانيكير ويرسموا حنة.

أول ما حد بـ يسجل اسمه سواء فى قاعة المعرض، أو على الموقع الإلكترونى بـ يأخذ كارت
خلال وجوده هناك فيه تخفيضات على منتجات الشركات الموجودة أو الراعية للمعرض
بالإضافة إلى الكتيب.

برنامج المعرض بـ يشمل
فى اليوم الأول (بدءًا من الساعة 3 عصرًا): عرض لأحدث قصات الشعر مع الكوافير
بشارة حداد من لبنان، والكوافير صلاح شديد من مصر، عرض أزياء للمصمم رضا مصطفى، ندوة
لشركة “Lyones”،
عرض لمستحضرات التجميل.

أما فى اليوم الثانى
(بدءًا من الساعة 4 عصرًا) هـ يبقى فيه ندوة للبروفيسور فيليب علوش عن العناية
بالبشرة والجلد، عروض لأحدث قصات الشعر مع إيلي فارس من لبنان، وكمال عبد المطلب
من مصر، وعرض لقصات الشعر مع سمير الأسمر من لبنان، محاضرة للدكتورة مها رداميس عن
التغذية والرشاقة، وعرض قص وصبغة للشعر لمصفف إيطالي.

وفى اليوم الأخير (بدءًا
من الساعة 5 مساءً) هـ يبقى فيه عرض لقصات الشعر مع إيلي فارس  من لبنان، ومع محمد فرانس من مصر، ومحاضرة
للدكتور بهاء الدين ناجى استشارى السمنة والتغذية، إلى جانب عرض أزياء للمصمم رضا
مصطفى.

طبعًا البرنامج مش بـ
يبقى كده وبس، لأ فيه مفاجأت كثيرة، وبـ يكون فيه فقرات بـ يُعلن عنها فى حينها
خلال الأيام الثلاثة.

لمزيد من المعلومات أو
لو عندك أى استفسار كلمهم على: 01006949233 – 2270488402