The Definitive Guide to Living in the Capital , Cairo , Egypt

من الواضح، ومن الجميل كمان، أن صناع السينما والدراما في العالم العربي، أدركوا بسرعة أن فيه جيل جديد دخل على الخط، جيل جديد بمشاكل جديدة وتحديات جديدة، بالتالي يستحق دراما جديدة، تناسب مفردات حياته المُختلفة، ووجود عناصر جديدة تماما فيها زي السوشيال ميديا والـ Smart phones وغيرها. الجيل ده هو جيل الألفية أو Generation Z. وهو ده الوتر اللي بيلعب عليه مسلسل (منعطف خطر).

منعطف خطر، من انتاجات منصة شاهد. المسلسل بيحكي عن الإنفلونسر (سلمى الوكيل) اللي بتتعرض للقتل، وبيتم تكليف ظابط شرطة عنده حياة شخصية مضطربة (باسل خياط) بالتحقيق في القضية، علشان يبدأ في الكشف عن سلسلة لا تنتهي من المخالفات القانونية والأخلاقية، وشبكة معقدة من المصالح والخدمات المتبادلة. مش بس بين مجموعة الشباب الصغير، لكن بين أهاليهم كمان.

فريق كتابة منعطف خطر (محمد المصري وأحمد جودة وعلي جبر) كانوا متأثرين بشكل كبير بالواقع اللي بنعيشه النهارده. بعض الشخصيات حسينا أنها قريبة جدًا من شخصيات بنشوفها حوالينا في المجتمع، زي رئيس النادي اللي بيحاول يحمي مصالحه الشخصية، ويحافظ على وجوده وأولاده في الانتخابات، ومحاولة منافسيه الاستفاده من المشاكل اللي بيقع فيها لتشويهه اعلاميًا. وزي الشاب اللي بيتورط في مجموعة جرائم جنسية ضد بنات. وغيرها من مشاكل بنشوف حاجات شبهها النهارده.

على الرغم من أن شخصية باسل خياط مكتوبة بشكل روتيني، بمعنى أننا بنشوف ظابط الشرطة اللي عاوز يحقق العدالة، ومش مهتم بنفوذ أعداؤه، وفي نفس الوقت حاطط مشتبه فيهم بعينهم قدامه وبيحاول يلاقي الأدلة على تورطهم، لكن أداء باسل خياط للشخصية كان مختلفة ومميز. ومن الواضح أن باسل مستفيد بكاريزمته الشخصية في العمل بنسبة كبيرة. باسل أصبح من الناس اللي بتستهويهم الشخصيات المركبة المعقدة بعد مشاركته في أعمال زي ٣٠ يوم، والرحلة، والكاتب.

باسم سمرة، بيقدم شخصية جمال الوكيل والد البنت الإنفلونسر. وده خلاه يورينا مجموعة انفعالات مُركبة، وعمل مشاهد أكتر من عظيمة، خاصة المشاهد وهو بيتخانق مع الصحفيين علشان يعطوه بعض الخصوصية بعد انتشار خبر وفاة بنته.

أداء باسم الرائع مش جديد عليه، لكن ساعده فيه الدويتو الرائع مع ريهام عبد الغفور.. والحقيقة أن ريهام ممثلة مصرية ممتازة، حاسين أنها مش واخدة حقها بالكامل رغم موهبتها المميزة، ولسه شايفينها في مسلسل تاني مميز هو (وش وضهر) في دور مختلف خالص عن دورها في منعطف خطر.

مخرج منعطف خطر (سدير مسعود) تعامل مع حاجات كتير بتعمل مشكلة لأي مخرج. منها السيناريو المتشابك، والتعامل مع أجيال مختلفة من الممثلين. لكنه قدر يخرج من الكل العقبات دي بسلام. ويقدم في النهاية مسلسل مترابط ومشوق. بنتوقع أنه يحقق نجاح كبير وبنرشحه لكم للمشاهدة بقلب جامد.