The Definitive Guide to Living in the Capital , Cairo , Egypt

كل سنة وانتوا طيبين! أيام قليلة ونستقبل شهر رمضان الكريم 2025، الشهر اللي بيجمعنا حوالين السفرة والتليفزيون، علشان نشوف المسلسلات اللي صناعها اشتغلوا عليها طول السنة. وزي ما العيد هو موسم السينما، رمضان هو موسم المسلسلات.. لكن السنة دي عندنا مسلسل واحد بيشغل الكل قبل حتى ما يتعرض، وهو “معاوية”.. تعالوا نشوف ليه كل الجدل ده حواليه!

معاوية.. مثير للجدل علشان قصته

المسلسل بيحكي عن واحدة من أكتر الفترات سخونة في التاريخ الإسلامي، الفتنة الكبرى، بداية من استشهاد الخليفة عثمان بن عفان، لحد حكم معاوية بن أبي سفيان، واستشهاد الحسين في كربلاء. الفترات دي دايمًا مثار نقاش وجدال، وأي عمل فني بيتكلم عنها بيواجه هجوم كبير، حتى لو كان مجرد كتاب!

معاوية.. مثير للجدل علشان فريق العمل

المسلسل من تأليف خالد صلاح، رئيس تحرير “اليوم السابع” السابق، ودي أول مرة يجرب حظه في الدراما بعد ما كان معروف كصحفي. أما الإخراج، فهو لواحد من أكبر مخرجي الأكشن في الوطن العربي، طارق العريان، اللي قدم أفلام بحجم “ولاد رزق” و”الخلية”، لكن دي أول تجربة تاريخية ليه، وده يخلي الموضوع مثير جدًا للاهتمام!

معاوية.. مثير للجدل علشان الممثلين

الفنان السوري لجين إسماعيل بيقدم دور معاوية بن أبي سفيان، وإياد نصار في دور علي بن أبي طالب، ومعاهم نجوم زي سهير بن عمارة في دور هند بنت عتبة، ووائل شرف في دور عمرو بن العاص، وسامر المصري في دور عمر بن الخطاب، غير نجوم كبار زي سوسن بدر، عائشة بن أحمد، صبا مبارك، وأسماء جلال. تجسيد الشخصيات التاريخية والدينية دي هو أكتر حاجة بتسبب جدل في أي عمل فني، و”معاوية” مش استثناء!

معاوية.. مثير للجدل علشان إنتاجه

المسلسل كان متأجل 3 سنين، وأخيرًا هيتعرض في رمضان 2025. والمفاجأة إن تكلفته وصلت لـ 100 مليون دولار! ده رقم ضخم حتى مقارنة بأكبر الإنتاجات العربية والعالمية، وده بيرفع سقف التوقعات جدًا!

معاوية.. مثير للجدل علشان ردود الفعل

من قبل حتى ما الحلقة الأولى تتعرض، المسلسل عامل زلزال على السوشيال ميديا.. ناس متحمسة وناس معترضة، لكنه بلا شك واحد من أكتر المسلسلات اللي هتتكلم عنها الناس في رمضان.

إحنا من ناحيتنا هنشوف المسلسل، وهنرجع لكم بتقرير تفصيلي عن تجربتنا، علشان نعرف مع بعض.. هل “معاوية” يستحق كل الضجة دي؟ ولا لأ؟