The Definitive Guide to Living in the Capital , Cairo , Egypt

من
غير تفلسف كثير، وبرغم النجاح الكبير اللي حققه من قبل ما يوصل لشاشة التليفزيون،
باسم يوسف ما حاولش أنه يعمل اسم مثير لبرنامجه الجديد على قناة أون تي في، أو أنه
يستمر باسم برنامجه القديم اللي كان بـ يقدمه على قناته الخاصة في موقع اليوتيوب
بـ عنوان «باسم يوسف شو» وحقق نسب مشاهدة عالية جدًا، ببساطة شديدة سمى البرنامج
بتاعه “البرنامج”، ورغم أنه اسم مالهوش أي معنى لو لأول مرة تسمعه إلا أنك
لازم تشوف البرنامج لأنك هـ تعرف ساعتها أنه فعلا “البرنامج”.

الدكتور
باسم رأفت يوسف، خريج كلية الطب سنة 1998، حصل على دكتوراة في جراحة القلب والصدر،
بـ يشتغل حاليًا عضو في هيئة التدريس بكلية الطب، سافر يشتغل في أمريكا وأوربا
لمدة سنتين ونصف، في شركات للأجهزة الطبية اللي بـ تطور تكنولوجيا زراعة القلب
والرئة، وبعدين رجع لمصر علشان يأخذ دكتوراه، وسافر بعدها لألمانيا علشان يتدريب
على جراحات زراعة القلب والأجهزة المعاونة لعضلة القلب، وبعدها حصل على زمالة كلية
الجراحين البريطانية عام 2006، ورخصة مزاولة المهنة بالولايات المتحدة 2005.

في بداية
البرنامج مكتوب: “هذا البرنامج لا يعبر عن آراء شخصية للقناة أو معديه أو
مقدمه ولكنه يتناول بشكل نقدي ساخر أنماط ومواقف سياسية واجتماعية مختلفة، فمن
قديم الأزل يمارس المصريون النقد والسخرية من كل شيء سواء كان عن أحوال أو أنفسهم
لكنهم لم يقتربوا من فراعينهم بشكل مباشر، وآن الأوان لأن نتحرر من الخطوط الحمراء
والنقاط المحظورة ونمارس حريتنا في النقد الساخر بشكل مبتكر، فنرجو أن تتسع صدوركم
إلينا وألا تغلقوا الباب في وجوهنا حتى لا نساهم في خلق فراعين جدد، ونؤكد ونصر
على احترامنا لجميع من يتناولهم البرنامج، وحق الرد مكفول للجميع”.

بـ
يقول عن نفسه أنه المذيع الألدغ الوحيد في الوطن العربي، وأنا بـ أقول أنه كمان
المذيع الأسرع في الكلام، والأكثر إصرارًا إن اسمه يُقال قبله كلمة دكتور.. دمه
خفيف، ولماح، وقيمة البرنامج بتاعه مش في خفة الدم ولا في شهرة باسم، ولا في أسلوب
التقديم، لكنها الموضوعات وطريقة المعالجة، من خلال مشاهدتك لـ
“البرنامج” هـ تتعلم تكون لماح، الأمور ما تعديش عليك وخلاص، تدقق وتحس
بالمفارقات والغرابة في الأمور اللي كانت بـ تعدي عليك من غير ما تفهمها، كمان
“البرنامج” مش قائم على أنه يقول أفيهات ويعمل لك مواقف تضحك ودمتم، لا
بالعكس، قائم على مناقشة قضايا كبيرة، باسم يوسف بـ يحط إيده على نقط خلافية
خطيرة، ومواضع التضليل اللي بـ تتم وتخلي الناس مش فاهمة حاجة.

في
الحلقات الأولى من “البرنامج” باسم ناقش موضوعات زي فضائح الإعلام السوري
في معالجة أحداث سوريا الحالية، وتناول الإعلام المصري لقضية حسين سالم وأخباره،
واللَبس الفظيع اللي حاصل في الأرقام والمعلومات والأخبار.

البرنامج
مش بس نقد، كمان بـ يقدم فقرات كويسة، زي مناقشة كتب طالعة جديد، أو شخصيات محترمة
كانت في الثورة، أو ناس مهمة بـ تخدم المجتمع، وبـ يكون حوار دمه خفيف، وفيه
معلومة.

لأنه
دكتور عنده معلومات كويسة بـ يقدمها، وعنده خلفية ثقافية محترمة بـ تمكنه من دعم
تقديمه بمعلومات مفيدة للمشاهد وبـ تُقال في سياق لطيف ما يزهقش، زي لما قال في
أول حلقة أن مراحل الحزن خمسة: الإنكار، الغضب، المساومة، الاكتئاب، التقبل، ودي
معلومة واخدها من علم النفس.

البرنامج
حلو جدًا لكن مش هـ يكون مناسب للناس اللي رأسها وجعتها من المشاكل والقضايا،
وعاوزة حاجة خالية من المضمون.

برنامج باسم
يوسف يُعرض في رمضان الساعة ٧:١٥ بعد الإفطار، والإعادة 2:00 صباحًا و6:00 صباحًا
و 12:00 ظهرًا.