The Definitive Guide to Living in the Capital , Cairo , Egypt

محمد علي خير مش مجرد مقدم برامج، هو ابن بلد قاعد على المصطبة، وسط الناس بتوع زمان، وبيحكي لهم عن اللي حصل لمصر.

يمكن لو كان حد تاني غير محمد خير هو اللي بيقدم البرنامج، كان فضل مجرد برنامج بيرصد الأحوال المختلفة للبلد، وبقى برنامج عادي، لكن اللي عايزين نركز عليه هو طريقة خير في الأداء، واللي بيظهر فيها وكأنه ممثل جيد جدًا، أو مؤدي بارع، أو راوي عليم بيحكي حدوتة كبيرة عن المصريين.

يمكن محمد خير شاطر في طريقته، وبيعرف يثبت اللي قدامه جدًا، حتى في حواراته بيتكلم تقريبًا أكتر من الضيف، وبيقاطعه كتير، ودي من السلبيات اللي ممكن ناخدها على أداء خير جدًا.

ديكور البرنامج بسيط، مش مزعج للعين، وبيتنقل ما بين كادرين، البرنامج أحياناً بيعرض تقارير خارجية، أو بيطلع هو ويصور بره الاستديو، في أماكن مفتوحة، ودي بتبقى حلقات خاصة.

الإخراج عادي، مبيقدمش أي إبهار جديد، في شكل الصورة أو في طريقة تقديم (خير) أو حتى في التقارير المنوعة، ويمكن ده راجع إن المذيع من النوع المخضرم، وبيبقى صعب على المخرج يفرض شخصيته قوي، مع النوع ده من المذيعين.

البرنامج مع إنه بيناقش قضايا سياسية واقتصادية واجتماعية، والمفروض إنه يركز عليها، ويحاول يستضيف خبراء من كل مجال علشان يناقشوا القضية، وهو فعلًا بيعرف يعمل ده كويس، ومعاه فريق إعداد كبير، وباين من كمية التقارير والأخبار والضيوف اللي موجودين معاه، لكن برضه البرنامج مابيحققش الهدف منه، البرنامج فيه مشكلة كبيرة.

المشكلة هي (التبرير)، أي إعلامي لازم يكون محايد، والمحايدة مش مجرد كلمة، لكنها مسؤولية ومسؤولية صعبة جدًا، عند خير أحيانًا بيلجأ لتبرير سلوك بعض المسؤولين حتى لو الأغلبية بتهاجمه، زي اللي حصل مع الوزيرة المصرية اللي راحت قابلت أحد رجال الأعمال في (اليخت) الخاص بيه، وكل الناس اتكلمت عن فكرة (المكانة) المصرية، وإن ده مينفعش، إلا خير اللي اتكلم على إننا لازم نعمل أي حاجة علشان الاقتصاد المصري، وفي النهاية الحكم ليكم، لما تتابعوه.