-
8 أبراج بدر
-
أطفال
-
Waleed Abuarab
تعرف كام محل ملابس تنكرية في القاهرة؟ طيب لو حبيت تجيب
ماسكات مرعبة وإكسسوارات وخدع للحفلات بـ تروح فين؟ عرفنا أن فيه ناس بـ تعمل
الملابس تفصيل عند الترزي بعد ما يشتروا هم القماش ويختاروا تصميم معين، ويجمعوا
الحليات والإكسسوارات بمعرفتهم ويضيفوها للزي التنكري.
لو ما عندكش طول بال للكلام ده لكن مضطر تحضر حفلة
تنكرية أنت أو أولادك الصغيرين، أو متعود تحضر احتفال الهالوين كل سنة بملابس
جديدة وتتنكر في شخصيات مبتكرة، «نيـﭭرلاند -Neverland» هـ يسهل لك المهمة وهـ تستمتع بجد
وأنت بـ تتفرج على الملابس والمعروضات اللي هي المفروض مرعبة لكن خفيفة الظل في
نفس الوقت، والتشكيلة الأكبر في المحل خاصة بملابس الأطفال من سن 3 سنين لـ 14 سنة
مثلًا، والتنوع مش كبير بالنسبة لملابس الكبار، لكن في النهاية المحل هـ يقضى
الغرض وهـ تعرف تطلع منه بـCostume
ظريف بالإكسسوارات بتاعته.
الفرع اللي رحناه كان في أبراج مدينة بدر في المعادي،
قريب من «كارفور» المعادي، لكن عرفنا أنه له فروع ثانية في شارع أبو الفدا في
الزمالك، وفي شارع متفرع من عباس العقاد في مدينة نصر، يعني البلد طلعت مليانة
محلات ملابس تنكرية وإحنا مش عارفين! المهم دخلنا المحل وكان العاملين وأصحاب
المحل بـ يقوموا بعملية إعادة ترتيب ورص للمعروضات وفهمنا أن ده استعداد لأعياد
الهالوين اللي بـ تبقى في آخر أكتوبر، وأصبح فيه أماكن كثير بـ تحتفل بالعيد ده في
مصر مؤخرًا زي نوادي الروتر أكت وبعض الجامعات الخاصة ده غير الإيـﭭينتات اللي بـ
يعملها شباب عاديين في الشوارع زي مهرجانات الكوربة والمعادي.
المحل مساحته مش كبيرة ومعظم المعروضات ملابس أطفال، فيه
ملابس عسكرية وملابس علاء الدين وسندباد للأولاد وفساتين سندريلا وبطلات الـFairy Tale و Snow-white
والفراشات للبنات، وفيه ملابس حيوانات زي الدببة والنحل والكتاكيت، والأسعار
لملابس الأطفال بـ تتراوح بين 150 لـ 180 جنيه للملابس لكن من غير الإكسسوارات،
وممكن تضيف شنبات وباروكات أو سيوف ودروع وصولجانات ومقشات بأسعار من 20 لـ 50
جنيه. وفيه علبة مكياج كاملة بألوان المياه ممكن ترسم بها الوجوه حسب رغبتك، ده
غير الأحجام المختلفة من ثمرات القرع البلاستيكية بضحكتها المرعبة اللازمة لاحتفالات
الهالوين.
تشكيلة كبيرة من الخدع والسوائل السحرية والمفرقعات،
وفيه ماسكات فرانكنشتاين وفريدي والكونت دراكولا وماسكات ثانية مرعبة، وأسعارها من
45 لـ 60 جنيه. فيه قبعات وأغطية رأس كثير تناسب شخصيات مختلفة أهمها برنيطة
الساحرات الشريرات وHook
عدو بيتر بان، وأسعار الإكسسوارات من 50 لـ 60 جنيه، يمكن أرخص حاجة هي الصوابع
واللون الأحمر اللي معاها زي الدم (5 جنيه) والشنبات والذقون الخاصة بالشخصيات
بنفس السعر.
ملابس الكبار كان فيها نقص وقت زيارتنا لكن عرفنا أن بعض
الأزياء المهمة هـ تكون متوفرة في اليومين الجايين، زي ملابس جاك سبارو والكونت
دراكولا وزورو وبعض الأزياء الفرعونية، سعر الزي الكامل بـ يكون من 275 لـ 350
جنيه، وده من غير الإكسسوارات والباروكات الخاصة بالشخصيات.
لعب كثير وجماجم وساحرات بالمقاشات بـ يتعلقوا في الأسقف
والحوائط وبـ يعملوا أصوات تخوف، متوسط الأسعار واحد؛ تقريبًا 50 جنيه، يمكن
الأسعار عمومًا غالية شوية لكن ده بسبب التفرد نوعًا ما وقلة المحلات من النوع ده.
زور أي فرع من فروع «نيـﭭرلاند» لو بـ تستعد للهالوين أو
غاوي مقالب وعاوز تخوف أصحابك أو مراتك.
