The Definitive Guide to Living in the Capital , Cairo , Egypt

الصورة الرئيسية: nabil boukala

يوم 27 نوفمبر، القاهرة شهدت انطلاق مهرجان العسل المصري السابع في حديقة الحرية بالزمالك، واللي مستمر لحد يوم 30 نوفمبر. المهرجان فرصة حلوة لشراء أفضل منتجات عسل النحل، وكمان التعرف على العالم ده عن قرب، فلو عندك أطفال، ممكن تزوروا المهرجان وتخوضوا تجربة وسط جمال الطبيعة في حديقة الحرية.

المهرجان ده تحت رعاية محافظة القاهرة، بالتعاون مع وزارات الصناعة والزراعة والبيئة والاستثمار، ومع دعم مجلس الوحدة الاقتصادية العربية واتحاد النحالين العرب.

في المهرجان بتشارك أكتر من 60 شركة وعارض من كل محافظات مصر وبعض الدول العربية، وبتلاقي هناك منافذ بيع منتجات العسل بأنواعه، ومشتقاته، وكمان الزيوت الطبيعية، والتمور، والتوابل.

المهرجان هدفه الرئيسي إنه يعزز صناعة العسل المصري، ويشجع على تصديره بصفته منتج وطني مهم بجودة عالمية. كمان بيدعم الصناعات اليدوية الصغيرة وبيقدم منتجات بجودة عالية وأسعار مناسبة للمواطنين.

إيه المميز في المهرجان الدورة دي؟

– استضافة طلاب المدارس في رحلات تعليمية للتوعية بفوائد العسل وتربية النحل وأهميته في التوازن البيئي.

– ورش تفاعلية تشرح أدوات تربية النحل، وطرق تعبئة العسل، وحتى المناحل اللي بتشتغل بالطاقة الشمسية.

– ندوات شيقة عن الذكاء الاصطناعي في تربية النحل وأساليب إنتاج نحل بجودة عالية.

– مسابقات ممتعة وجوائز حلوة جدًا بتوزع على الحضور.

وأخيرًا..

لو بتحب العسل، أو حتى مهتم تتعلم أكتر عن عالم النحل وإزاي تبدأ مشروع صغير، المهرجان ده فرصة ماتتعوضش!