The Definitive Guide to Living in the Capital , Cairo , Egypt

الشغف قادر يحول كل أحلامنا لحقائق، ومش شرط تكون أحلامنا مرتبطة بدراستنا، وده اللي حصل مع روان كمال، خريحة آداب قسم إعلام جامعة المنصورة، واللي كان عندها حلم فني مختلف، بدأ مع عجينة السيراميك، اللي قررت تصنع منها أجمل أشكال الأنتيكات والشخصيات المحبوبة، وفي الموضوع ده هنعرفكم على قصة روان ومشروعها الفني It’s Rouan.

بتحكي روان لـ كايرو 360 وبتقول إن الفكرة بدأت لما كان فيه واحدة صاحبتها بتعمل شغل هاند ميد من عجينة السيراميك، ففكرت وقتها إنها تجرب عالم عجينة السيراميك بما أن خطها حلو، وبالفعل حاولت تعمل ده، وأول حاجة عملتها كانت علاقات عربية، وبعدين قررت تطور نفسها في المجال ده، وبدأت تشتغل في صناعة الشخصيات الكرتونية، وأول شخصية عملتها كانت “كورتي البعبع” اللي ظهرت في فيلم شركة المرعبين المحدودة.

 وبالفعل بدأت روان تسوق لشغلها عن طريق السوشيال ميديا، وبدأت ناس تطلب منها أودرات لشخصيات كرتونية مختلفة، وبعدها ومن خلال مساعدة صديق قدرت تسوق شغلها اللي بقى متنوع سواء عجينة السيراميك أو الإكسسوارات وغيره في فروع مكتبة “ألف” في القاهرة، وبالفعل الشغل بتاعها ابتدى يتباع، ويطلب منها كتير، وبدأت تبيع شغلها لناس في دهب والساحل وهما بيسوقوا لها هناك.

وبعد كده بدأت شغل الأنتيك، وده بعد ما طلب منها عميل تصنع له شغل أنتيك مش محتاج مجرد ميدالية سيراميك، وكان أول أنتيك تعمله “كعبول وعبقرينو”، ومن هنا جت لها الفكرة إنها تبقى متميزة أكتر بشغلها فعملت كمان الفيل بابار وشخصية زيتونة وكونان وتوم آند جيري، وحاليًا بتشتغل على مشروع لزيتونة بـ6 أوضاع بشكل مختلفة.

تقدروا تطلبوا أي شخصيات محتاجينها مع العلم أن تنفيذ الطلبات بياخد وقت من يومين لأسبوعين حسب الماتيريال والحجم، والأسعار بتبدأ من 80 جنيه حتى 500 جنيه، من خلال صفحة الفيسبوك من هنا.