“مزيكا زمان”.. دُكان في الزمالك لأصحاب المزاج الفني العالي
أسطوانات قديمة للبيع حمادة مزيكا شراء جرامافون محل مزيكا زمان مزيكا زمان
Mohamed Talaat
لما بتمشي في الزمالك بتحس بالفعل إنك سافرت لزمن مختلف. المباني، الشوارع، الميادين، والمقاهي، كل التفاصيل بتقول إنك في مكان له طبيعة خاصة، علشان كدة كان لايق قوي على الزمالك إنها تكون المكان اللي فيه محل اسمه “مزيكا زمان”، واللي بيوفر لعشاق الموسيقى جرامافون من بتوع زمان، وأسطوانات قديمة، وألبومات من بتاعة الثمانينات والتسعينيات، وأكتر.. يعني باختصار أنت بتسافر فعلًا لـ “مزيكا زمان”.
في 2 شارع بهجت علي، هتشوف محل غريب، معروض في فاترينته أشكال مختلفة من راديوهات زمان، بالإضافة للأسطوانات القديمة (المستديرة) ومنتجات أكتر كلها بترجعك لفترة جميلة كان فيها الفن المصري مختلف جدًا.
لما هتدخل المحل هتحس فعلًا إنك عبرت بوابة سحرية هتخليك تشوف منتجات قديمة كتير قوي. زحمة فن وإبداع وحنين للماضي.
هتقدر تشتري جرامافون، وأسطوانات لأجمل النجوم المصريين والعالميين، زي أم كلثوم وفيروز، وأسطوانات تانية لفرقة المصريين، ولو بتدور على ألبومات قديمة من بتاعة فترة الثمانينات والتعسينيات هتلاقيها هناك، وحتى أجهزة الراديو كاسيت القديمة موجودة.
عجبنا جدًا أشكال الراديو القديم اللي موجودة في “مزيكا زمان”، راديوهات من الأصلية، اللي عمرها أكتر من 50 سنة، ده غير الساعات القديمة، والكاميرات، والنظارات المكبرة، وأكتر.
المكان بيوفر كمان أجهزة تليفون من بتاعة زمان اللي هي بالقرص، بأشكال كتير.
الأسعار في المحل معقولة، خصوصًا وإن المنتجات دي تعتبر “أنتيكات” في عصرنا الحالي، يعني وارد تلاقي عندهم حاجات بأسعار خيالية.
عنوان مزيكا زمان: 2 شارع بهجت علي، الزمالك.
صفحة الفيسبوك هنا.
