The Definitive Guide to Living in the Capital , Cairo , Egypt

سيدتي الجميلة اللي بـ تلف مليون مكان لحد ما تعرف هي عاوزة تشتري إيه، وممكن تبقى بـ تلف وتطلع عين الرجل في المحل وتقيس كذا حاجة، وبعد كده تمشي وما تشتريش خالص، والرجل يبقى عاوزيأكلها أو يشد فى شعره.

“كات ووك – Catwalk” محلنا بتاع النهارده مش في مول علشان تقارني بينه وبين المحلات الثانية، بس هو مكانه متميز ويستاهل أنك تروحيله مخصوص. ولفت انتباهنا شكله من بره، اللي ممكن يخدعك في البداية ويخليكى تظنى أن المحل ماركة محترمة.

المهم دخلنا المحل واكتشفنا أنه محل مصري 100%، حتى الحاجات المستوردة اللي فيه جودتها وسعرها ما تفرقش كثير خالص عن المصري.

أول ما بـ تدخل المحل بـ يستقبلك الموظف، اللي يا حرام بـ يفضل رايح جاي يجيب لك مقاسك المناسب، ومهما تقول له على أنواع مختلفة يجيب لك اللي أنت عاوزه، وهو مبتسم وبمنتهى الذوق.

الأسعار هناك عادية لا غالية ولا رخيصة، بـ تبدأ الـBallerina من أول 100 لحد 160 وعنده تشكيلة Talons حلوة، فيها أنواع مختلفة من الجلد وألوان هادية ومريحة، سعرها بـ يبدأ من 130 لحد 250 جنيه.

بس أجمل حاجة عنده كانت تشكيلة الشنط المختلفة الـHigh Copy لماركات مختلفة زي  Burberry, Chloe.. إلخ وأسعارها مش غالية خالص من 250 لـ 300 جنيه.

المحل مش كبير قوي ولا صغير قوى، المهم بس وأنتم بـ تختاروا نوع الجزمة، اختاروا نوع جلده مريح، وماتصدقوش أسطورة أن الجلد بـ يريح، لأنه عقبال ما يريح تكون رجل حضرتك حصل فيها إصابات بالغة وهـ تفضلي أسبوع مش عارفة تلبسي إلا سحافى أو Crocs.