دليل كايرو 360 لجولة تفصيلية في سوق الجمعة
أدوات أسماك السيدة عائشة السيدة عيشة بضاعة تابلوهات تراث جرامافون سباكة سوق سوق الجمعة طيور كلاب ملابس موبايل
Mohammed Sabry
من تحت كوبري التونسي في ميدان السيدة عائشة، ولحد مجزر البساتين، ده المكان اللي بيتجمع فيه البياعين بكل أنواع البضائع، من الإبرة للصاروخ، كل جمعة. علشان يعرضوا بضاعتهم المختلفة للناس في “سوق الجمعة”.
وإحنا في السطور اللي جاية هناخدكم في رحلة، تتعرفوا فيها على سوق الجمعة المشهور. والبضائع المتنوعة اللي موجودة هناك، ومتوسط أسعارها. يلا بينا.
صحيح ميدان السيدة عائشة بيكون زحمة كل أيام الأسبوع، إنما يوم الجمعة أنتم على ميعاد مع سوق الجمعة المشهور، اللي بييجي له زوار من القاهرة وضواحيها. في بداية الرحلة هتقابلوا سوق الكلاب. واللي فيه أنواع مختلفة من كلاب الحراسة، أو الكلاب العادية. ودي بتبدأ أسعارها من 100 جنيه للجرو اللي عمره 50 يوم.
لما تدخلوا أكتر في السوق هتقابلوا أنواع تانية من الحيوانات والطيور. منها التماسيح، والقرود والنسانيس، وثعابين. وكمان فيه ركن خاص للحمام والعصافير. بتكون بأشكال وأنواع مختلفة، وسعرها أقل من الأسواق التانية. ومن أهم أنواع الحمام الموجودة في السوق: قشر البندق – النفاخ – البهلوان – الكوشوك – العنبري. وأحيانًا بيتعمل مزاد على الأنواع النادرة من الحمام، وبيتراوح سعر من 50 لـ 1000 جنيه.
وغير الحمام في طيور زي الكروان والبغبغان. وبيبدأ ثمن الطير الواحد من 100 جنيه. وفي كمان أنواع نادرة من البغبغان اللي بيتكلم، زي البغبغان الزنجباري. ده غير محلات سمك الزينة، اللي بتبيع كل 4 سمكات بـ 10 جنيه.
وما تستغربش لو حد وقفك وعرض عليك يشتري نضارتك أو ساعتك أو موبايلك، أو أي حاجة ممكن تتباع معاك، دي حاجة بتحصل عادي في السوق.
ندخل بعد كده على شارع رابعة العدوية، اللي بتتباع فيه الهدوم المستعملة بس بحالة كويسة. الأهالي بييجوا هنا يشتروا اللبس بأسعار رخيصة، بدل الأسعار الغالية في المحلات. وفي أوقات كتير بيكون اللبس الموجود جديد، والفرق إن البياعين مش بيضيفوا عليه الضرايب بتاعت المحلات. فبيكون سعره أقل حوالي 40%. وعلى بعد أمتار من الشارع هتلاقي محلات السباكة. واللي أسعارها أقل برضه من برة.
أما بقى الناس اللي بتحب الحاجات القديمة، زي الحيوانات المتحنطة، أو التابلوهات الأصلية، أو الصور الأبيض والأسود، يبقى لازم تروحوا شارع 16. هناك في كل حاجة شايلة عبق الماضي من قطع الأثاث النادرة، وقطع النحاس زي الأباريق والصواني، وأدوات المائدة المحفور عليها يدويًا. أو جرامافون قيم مع اسطواناته الكاملة بأغاني سيد درويش وأم كلثوم.
ده كان دليل سريع كده مننا، علشان لو روحتوا يبقى عندكم فكرة عن المكان.
