حكاية مربى بيتي في القاهرة هتأكلها بسعادة
كلها بسعادة كيك بيتي في القاهرة مربى كلها بسعادة مشاريع سيدات مصريات مشاريع منزلية منتجات مربى بيتي في القاهرة نماذج ناجحة
Cairo 360
رنا شرف
مصر فيها نماذج ملهمة، بتقدر تحول أحلامها لحقيقة مهما كانت الصعوبات، زي “أسماء”، السيدة المصرية اللي قررت تصنع المربى والكيك على طريقتها الخاصة، وتعمل براند مصري بيتي اسمه “كلها بسعادة”، تقدم من خلاله كيك ومربى بيتي بجودة عالية وبسعر مناسب.
تعالوا نعرف حكاية أسماء ومنتجاتها اللي أكيد أكيد هتحب تأكلها بسعادة.
المربى حاجة أساسية في الإفطار لناس كتير مننا، سواء كبار أو صغار، بنحبها بكل الأشكال، ويا سلام علي مربى فروالة مثلًا مع توست ولا مع بسكويت، وياااه لو مع الزبدة، بتكون حاجة عظمة.
و”أسماء” سيدة مصرية مجتهدة ومصدقة حلمها، كان عندها حلم أنها تعمل حاجة بتحبها وفي نفس الوقت يكون لها عائد ربحي، فقررت تصنع أكثر حاجة هي شاطرة فيها؛ المربي والكيك.
“أسماء” حولت مطبخ بيتها لمصنع صغير لعمل المربى والكيك، وأطلقت مشروعها “كلها بسعادة”، وقالت لنا إن الإسم سببه أنها بتحب الضحك والسعادة والجو المبهج، وكل أصحابها عارفين ده عنها، وأى مكان كانت بتروحه بتاخد لحبايبها فيه مسبب من مسببات السعادة، زي المربى أو الكيك اللي هي بتعمله بطريقة مميزة بشهادة كل معارفها.
وعن اللي بيميز منتجات كلها بسعادة عن أي منتجات تانية في السوق، قالت لنا “أسماء” إنها بتستخدم فواكه بجودة عالية وفريش، ومابتحطش أي مواد حافظة في منتجاتها، وده بيخليها صحية أكثر.
“أسماء” أجادت صناعة المربى بسبب أن والدتها كانت شاطرة جدًا في الحتة دي، وبتقول إنها ورثت عنها سر الصنعة.
هدف مشروع كلها بسعادة هو أنه يقدم للناس مربى زي اللي كنا بنأكلها زمان في بيوت أهالينا، طبيعية ومن غير أي إضافات صناعية.
وعن أكثر نوع الناس بتحبه من منتجاتها بتقول “أسماء” إن جمهورها بيحب مربى التوت اللي بتعملها، وكمان مربى المشمش.
بتحلم “أسماء” يكون عندها محل خاص تعرض فيه منتجاتها ومنتجات أي ست عندها مشروع خاص بها.
وعن أسعار منتجاتها بتقول “أسماء” إنها معقولة وسعر البرطمان عندها 100 جنيه، وده سعر كويس بالنسبة لمربى بيتي خالية من المواد الحافظة.
لو عاوزين تجربوا منتجات أسماء ادخلوا على حسابها على إنستجرام من هنا.
أو كلموها على: 01119957049.
