The Definitive Guide to Living in the Capital , Cairo , Egypt

كلنا لاحظنا الفترة الأخيرة إن الأسعار بتزيد كل يوم، وواضح إنها مكملة المشوار. وطبعًا كلنا عارفين إن معظم الماركات اللي بيحبها المصريين مستوردة من بلاد الفرنجة، فكان لازم نبدأ ندور على حل بديل – والبديل هو المنتج المحلّي. الخبر الكويس إن مصر فيها ماركات كتيرة بتقدم جودة عالية وموديلات مختلفة، وبكده يكون عندنا بديل ينقذ عشاق الموضة في الظروف القاسية اللي إحنا عايشينها اليومين دول.

واحدة من الصفحات الإلكترونية اللي بتقدم تشكيلة من الشنط والمحافظ وسلاسل المفاتيح للسيدات مناسبة كل الأذواق هي بالما. صفحة بالما الرئيسية معروض عليها أكتر منتجاتهم مبيعًا، والموقع الرسمي بتاعهم شكله لطيف،بس الفكرة إنه محتاج تركيز عشان نشوف كل حاجة عندهم.

بالما بيقدموا تشكيلة متنوعة من الشنط جلد صناعيونبتدي مع شنط الظهر. في عندهم شنطة أوريجينال (415 جنيه) بلونين مختلفين؛ سمني ورمادي أو كافيه وجملي. الشنطة تعتبر أكبر شوية من الموجود في السوق، وبتتكون من جيبين داخليين وجيب مخصوص للموبايل، ومعاهم ثلاثة جيوب من بره بزراير مغناطيسية.جايز شنطة أوريجينال مش ماشية مع الموضة شوية، بس ألوانها تليق مع أي حاجة.

أما الناس اللي عايزة حاجة على الموضة، بالما عندهم شنط ظهر مدورة (395 جنيه) ماشية مع أحدث صيحات الموضة وألوانها. الشنطة فيها جيبين داخليين وجيب للموبايل، وجيبين كبار بسوستة من بره. الشنطة المدورة متوفرة بألوان روز بودرة وأسود وأخضر نعناعي.

بالنسبة لعشاق الرسومات بالما عندهم كمان شنطة ظهر مستطيلة (395 جنيه) برسومات ملونة على أجناب الشنطة وحلياتها. الشنط دي بسيطة جدًا ومفيهاش أي جيوب خارجية، وكل اللي فيها جيب بسوستة وجيب تاني للموبايل.

بالما غير شنط الظهر عندهم مجموعة من الشنط بجيبين (440 جنيه)، عبارة عن شنطة كروس فيها مكان للاب توب 15.6 بوصة، وتعتبر ممتازة للناس اللي بيشيلوا أدوات الشغل بتاعهم طول الوقت.

بالما كمان عندهم مجموعة شنط عادية أقل شهرة من المجموعة اللي فاتت أسعارها تتراوح بين 295-380 جنيه.

بالنسبة لشنط أدوات الماكياج من بالما فموجودة بأحجام وأسعار مختلفة، يعني مثلًا الشنطة الصغيرة سعرها 140 جنيه والكبيرة 240 جنيه، بس طبعًا الكبيرة عملية أكتر وبتشيل كل أدوات الماكياج بتاعتك. عندهم كمان سلاسل مفاتيح مختلفة بسعر واحد (95 جنيه).

لو كنا شوفنا الأسعار دي من كام شهر كنا هنقول على طول “إيه الأسعار الغالية دي؟”،لكن طبعًا لو هنقارنها بأسعار الماركات المستوردة فأكيد أسعار بالما معقولة جدًا خصوصًا مع جودة منتجاتهم وستايلها المميز. هو ده وقت المنتج المصري.