The Definitive Guide to Living in the Capital , Cairo , Egypt

أغلب الأسواق الشعبية في مصر متخصصة، وده بيديها قدر كبير من التميز، مثلًا معروف إن أحسن قماش تنجيد هتلاقيه في الوكالة، وأحسن نجف في درب البرابرة، لكن لو عاوز تشتري حيوانات يبقى عليك وعلى سوق الجمعة. أما بقى الكتب الرخيصة فمافيش أحسن من سور الأزبكية. وفي السطور الجاية هنعرفكم على أكتر الأسواق الشعبية اللي بتوفر حاجات سعرها رخيص وجودتها كويسة.

 أسواق منطقة العتبة والغورية وخان الخليلي

من أسهل المناطق اللي ممكن توصل لها سواء بالمترو أو من وسط البلد، وهتلاقي فيها كل اللي أنت محتاجه سواء لبس أو شنط أو تذكارات للسياح أو وسائل إنارة ملونة وعصرية، أو حتى سبح ولبس فلكلوري. ومعروف إن منطقة العتبة مثلًا من أرخص الأسواق في القاهرة، وكمان فيه جنبها سوق حمام التلات اللي تم تأسيسه من حوالي 700 سنة، وده مخصص لبيع كل حاجة محتاجها العرائس من لبس وعطور ومواد للتجميل وجزم كمان.

 سوق شارع عبدالعزيز

شارع عبدالعزيز في وسط القاهرة واللي يعتبر قريب من العتبة، هو المكان الوحيد اللي هتلاقي فيه كل الأجهزة المنزلية وأجهزة المحمول واكسسواراتها. وأكتر حاجة بتميزه أسعاره الرخيصة جدًا مقارنة بالمولات وباقي المحلات الفخمة. لكن لازم تاخد بالك كويس قوي وأنت هناك.. يعني أمن ولا تخون.

سوق المناصرة

منطقة المناصرة  دي جنب ميدان رمسيس، ومعروفة بأسعارها الكويسة، خاصة في بيع الموبيليا والآثاث المنزلي، وأي حد من متوسطي الدخل عاوز يفرش بيته أو يجهز بنته بيروح هناك. لأن فيه تشكيلات كبيرة ومحلات متنوعة وأسعار على قد الإيد تقدر تساعد الشباب أنهم يكونوا بيت بأسعار معقولة.

أما لو بتدور على سوق للرخام والجرانيت فعليك وعلى منطقة شق الثعبان اللي هتلاقي فيها كل اللي أنت محتاجه.

سوق الحرفيين

ومدينة الحرفيين  دي بره القاهرة بحوالي 40 كيلو متر، وبيروحها تجار وأصحاب العربيات من كل مكان لأنها أكبر سوق متخصص في بيع قطع غيار العربيات في مصر، حتى لو عربية نادرة.

منطقة الوكالة

أرخص أسواق اللبس والقماش في مصر سواء تنجيد أو ستاير أو قماش. فهى متخصصة في بيع الهدوم الجديدة والمستعملة ومعروفة بأسعارها الحنينة وتنوع محلاتها، الوكالة موجودة بالقرب من كورنيش النيل وراء مبنى الإذاعة والتليفزيون “ماسبيرو” وبتتكون من حارات صغيرة بتنتشر فيها المحلات المختلفة.

سوق الإمام الشافعي أو سوق الجمعة

سوق الإمام الشافعي جواه أسواق صغيرة ممتدة حوالي 3 كيلومترات هي؛ سوق للكلاب وسوق للقطط وللعصافير ده غير  سوق الملابس المستعملة والبضائع العادية والأحذية، ويعتبر السوق عند ضريح الإمام الشافعي بمنطقة القلعة وده سبب تسميته بالاسم ده، وبييجوا البياعين كل يوم جمعة من كل أسبوع علشان يبيعوا بضاعتهم. 

سوق سور الأزبكية

ودي بقى المكان المفضل لعشاق الكتب وطلاب العلم والمثقفين من كل الأعمار والثقافات، لأن بيكون فيها كتب مستعملة أوجديدة بسعر قليل جدًا، ده غير أنه بيكون عندهم الكتب القديمة النادرة.

ودي شوية نصايح قبل ما تروح أي سوق شعبي

الفصال هو صديقك الصدوق، لازم تفاصل حلو علشان تخرج بصفقة ناجحة.

خللي بالك من السلع المضروبة أو البايظة لازم تاخد معاك حد بيفهم كويس.

خللي بالك من الحرامية والنشالين.. يعني لازم تأمن نفسك كويس.

البس لبس رياضي وحذاء مريح علشان تمشي براحتك من غير ما تتعب.

نتمنى لك صفقة ناجحة!