Mohamed Talaat
إحنا في كايرو 360 بنشجع الجميع على الجلوس في البيت الفترة دي، علشان نحارب فيروس “كورونا” المستجد ونقلل انتشاره، وعلشان القراءة جزء مهم جدًا في القعدة في البيت، في السطور الجاية هنقول لكم على 5 مواقع إنترنت في مصر تقدروا تشتروا منها الكتب أونلاين وتوصلكم لحد باب البيت.
خلينا في البداية نوضح أن للشراء أونلاين فوائد كتير، أولها أنكم مش هتسيبوا البيت وتخرجوا، وبالتالي مش هتتعرضوا لخطر “كورونا”، كمان هتقروا نبذة مختصرة عن الكتب اللي هتعجبكم قبل ما تشتروها، وهتوفروا وقت وجهد البحث في المكتبات، وممكن تتعرفوا على آراء القراء في الكتب، ده غير عروض والخصومات، وكمان هتقدروا تدفعوا عن طريق الفيزا أو الدفع عند الاستلام.
مكتبة الشروق
هتلاقوا على موقعهم كل الإصدارات اللي محتاجينها من الكتب بكافة أنواعها، سواء عربية أو مترجمة أو بلغات مختلفة، كل اللي عليكم تدخلوا على الموقع الإلكتروني بتاعهم وتختاروا اللي محتاجينه.
لشراء الكتب زوروا موقعهم الإلكتروني من هنا.
بيت الكتب
عندهم إصدارات مختلفة لدور نشر كتير، وتقدروا تختاروا أي أنواع كتب تعجبكم، وعلى الرغم من أن مقرهم في الإسكندرية إلا أنهم بيشحنوا لكل محافظات مصر، وفي وقت سريع.
لشراء الكتب زوروا موقعهم الإلكتروني من هنا.
ديوان
من أشهر المكتبات في القاهرة، واللي هتلاقوا على موقعهم كل الكتب اللي نفسكم فيها، وكمان عاملين خدمة التوصيل مجانًا لو طلباتكم زادت عن 200 جنيه.
لشراء الكتب زوروا موقعهم الإلكتروني من هنا.
جوميا
لو أنتم محتاجين لأي أنواع كتب، فأكيد هتلاقوها في موقع جوميا اللي عندهم مجموعة متنوعة من الكتب المختلفة، من إصدارات دور نشر كتيرة.
لشراء الكتب زوروا موقعهم الإلكتروني من هنا.
سوق
عندهم كتب في كل المجالات وكمان مش هتتعبوا إنكم تدوروا علشان هما مقسمين الكتب بأنواعها فتدخلوا على القسم اللي محتاجينه بدون تعب، وكمان خدمة التوصيل عندهم سريعة داخل القاهرة الكبرى.
لشراء الكتب زوروا موقعهم الإلكتروني من هنا.
