The Definitive Guide to Living in the Capital , Cairo , Egypt

طبيعي جدًا أن المنافسة في المجالات المزدحمة بـ تكون أصعب بكثير منها في المجالات الهادية، لكن إمكانية التميز فيها بـ تكون أكبر، وبـ تكون الفرصة مواتية جدًا للتفرد والظهور وشد الأنظار بفكرة عبقرية غير تقليدية، وسط كل التقليديين اللي استسلموا لوجودهم في مجال شائع وتقليدي.

ولو جينا نجر الكلام ده كده لـ "سوق" مساحات العمل المشتركة، هـ نلاقي أن الموضوع –من فترة قريبة جدًا- كان فكرة جديدة ووسط لسه بـ يتكون وكل اللي بـ يدخلوه بـ يدخلوه بنوع من التردد أو اعتقاد المجازفة، وده -تقريبًا- كان مع نهاية سنة 2014 وبدايات 2015، لكن خلال السنة دي حصل ما يشبه الانفجار، انفجار نشأ عنه وجود عشوائي وكثيف لكثير جدًا من مساحات العمل المشتركة بأهداف متنوعة وفي أماكن مختلفة، وبدأت الدنيا تتزحم نسبيًا، وبقى واجب على أي حد يفكر يدخل في الوسط ده أنه يفكر إزاي هـ يقدر يتميز ويقدم خدمة مختلفة، قبل ما يفكر أنه ياخد أي خطوة في مشروعه.

وده كان التحدي الأكبر اللي قابل مساحة العمل المشتركة "TYT" أو "Take your Time" لما كان ناسها بـ يفكروا يبدأوا، وزاد من صعوبة التحدي أن الموقع اللي كان متوفر لهم لبدء المشروع هو موقع مزدحم جدًا بمساحات العمل المشتركة المتميزة.. منطقة الدقي، وميدان المساحة تحديدًا، وبالتالي فالاختلاف والتميز أصبح أمر حتمي مش رفاهية ولا اختيار، وعلشان كده بدأ أصحابها يشوفوا كل مساحات العمل المشتركة المحيطة بهم ويقيموا خدمتهم ويفكروا ممكن يقدموا إيه مختلف عنهم، ولقوا أن كل مساحات العمل المشتركة مهما تميزت خدماتها فمتوسط عدد ساعات العمل مش بـ يزيد عن 12 ساعة تقريبًا، فلو حد يومه زحمة شوية وبـ يضطر أنه يرحل أعماله الحرة لوقت متأخر شوية أو ينجزها في وقت بدري شوية مش هـ يعرف يعمل كده في مساحات العمل المشتركة المتوفرة، ومن هنا جات فكرة الخدمة الإضافية اللي ممكن تتقدم ومنها كمان فكرة الاسم "Take Your Time".

المكان على عكس كل الأماكن الموجودة تقريبًا بـ يبدأ شغله من 9 صباحًا وبـ ينتهي الساعة 12 فجرًا، يعني زيادة 3 ساعات على الأقل عن معظم الأماكن الثانية، و3 ساعات في أوقات محورية جدًا بالنسبة للناس اللي طبيعة يومهم زحمة زي ما قلنا، وطبيعي أن اللي يفكر بالعقلية دي لازم ياخد باله أن خدمته هـ تفيد فئة محددة، لكن بالنسبة للى ما بـ ينتميش إلى الفئة دي فالأمر بالنسبة له مش هـ يكون فارق أوي، وبالتالي كان لازم أصحاب المكان يفكروا في خدمات إضافية لها طابع عام، بحيث أنها تخدم فئات أكثر وتغطي مساحة مستفيدين أكبر، حتى وإن كانت خدمات تقليدية أو عادية.

لكن القاعدة بـ تقول: "الأعمال العظيمة قد تكون في الواقع أعمال عادية لكن الطريقة التي تمت بها جعلتها عظيمة"، يعني مثلًا: خدمة الانترنت، توفر الهدوء، المحافظة على الخصوصية، كلها خدمات عادية جدًا وطبيعي أنها تكون موجودة في أي مساحة عمل مشتركة، لكن التفاوت بين الأماكن عمره ما بـ يكون في وجود الحاجات دي أو عدمه، إنما بـ يكون في مدى مراعاتها والاهتمام بالإبقاء عليها واستمرارها على نفس المستوى حتى بعد ما يزيد استهلاك المكان، ودي نقطة تميز ثانية مهمة بـ يحاول أهل "TYT" أنهم يفضلوا مركزين عليها.

ولو حبينا نضرب مثال علشان الفكرة توضح ممكن نتكلم مثلًا عن التليفون الداخلي اللي حاطينه في كل Meeting Room علشان تبقى عملية التواصل بين الـ Administrator وبين الناس اللي في الـ Room عملية هادية وما يحصلش قطع لتركيز الناس وهي شغالة أو التشويش عليهم أو على غيرهم بكثر الحركة.

باقي علينا نقول لكم أن نظام القعدة في المكان إما بـ تكون في مساحة مشتركة Shared Space وده بـ يكون مقابل 5 جنيه في الساعة، واللي مطوّل بـ يدفع 20 جنيه بحد أقصى في اليوم، وبـ يكون له 3 مشروبات سخنة من بوفيه المكان، أو بـ تكون القعدة في Meeting Room علشان الخصوصية أو علشان الأعداد وده بـ يكون مقابل 5 جنيه في الساعة الأولى، و4 جنيه في الثانية، و3 جنيه في الثالثة، وبعد كده بـ تتحسب كل ساعة بـ 3 جنيه، ده بالنسبة لكل فرد موجود في الـ Meeting Room.

وباقي علينا كمان نعرفكم أن المكان موجود في 5 ميدان المساحة – الدور الثالث – عمارة Our Kids – الدقي، ونعرفكم أنكم لو حابين تتواصلوا مع الناس هناك ممكن تكلموهم تليفونيًا على الرقم ده 0237605826 أو تتواصلوا إلكترونيًا من خلال صفحتهم على الفيسبوك.

زيارة سعيدة، وقعدة مريحة ومفيدة إن شاء الله!