The Definitive Guide to Living in the Capital , Cairo , Egypt

مرحلة جديدة هنشوفها قريب في قطاع وسائل النقل الجماعي، هيكون أول خطوة فيها توفير قطار مكهرب بيتم التجهيز لإطلاقه قريبًا، وهيخدم مناطق شرق القاهرة وهيكون خط سيره “السلام – العاصمة الإدارية الجديدة – العاشر من رمضان” وفي السطور اللي جاية هنقولكم على كل المعلومات اللي محتاجين تعرفوها عن أول قطار كهربائي في مصر.

المشروع هيتكلف 461 مليون دولار لأعمال الإنشاء للمحطات والكباري والأنفاق والقضبان، وهيتنفذ بواقع 74 كيلو متر، وهياخد سنتين شغل، وهيتم التنفيذ تحت إشراف هيئة مترو الأنفاق، وبالشراكة مع شركة أفيك الصينية اللي هتكون مسئولة عن نظم الإشارات والتحكم والإتصالات، وكمان هتورد عربات القطار بتكلفة 739 مليون دولار.

وحسب أخبار اليوم فمحطات القطار المكهرب هتكون كالتالي: “عدلي منصور – العبور- المستقبل – الشروق 1 – الشروق 2 – الورش – بدر- الروبيكى – العاصمة الإدارية الجديدة – المنطقة الصناعية – العاشر من رمضان” وهيمر القطار أعلى محور سعد الدين الشاذلي من خلال كوبري علوي، وهيكون جنب كل محطة جراج عربيات، علشان لو حبيتوا تركنوا عربياتكم وترجعوا تستخدموها تاني بعد المشوار.

مميزات القطار الكهربائي إنه هينقل 60 ألف راكب في الساعة، وسرعته هتكون من 70 لـ 120 كيلو متر في  الساعة، وهيتم بناء أسوار المشروع بطول 140 كم دلوقتي، بتكلفة نهائية لحد ما هيبدأ تشغيل هتوصل لـ 1.2 مليار دولار.