The Definitive Guide to Living in the Capital , Cairo , Egypt

خبر جديد صدر النهارده الاثنين وممكن يزعل الناس اللي بتحب زيارة المتاحف الفنية والقومية.

النهارده د. إيناس عبد الدايم، وزيرة الثقافة، أصدرت قرار بتطبيق قيم زيادة أسعار تذاكر دخول وزيارة المتاحف الفنية والقومية التابعة لقطاع الفنون التشكيلية.

وتضمن القرار 11 متحف فني زادت أسعار تذاكر الدخول إليها بنسب متفاوتة على حسب كون الزائر مصري أو طالب مصري أو أجنبي أو راغب في التصوير الفوتوغرافى.

على سبيل المثال أصبحت قيمة تذاكر دخول متحف الفن المصري الحديث بالنسبة للمصريين 10 جنيه وبالنسبة للطلبة 5 جنيه، وبالنسبة للأجانب 20 جنيه، ونفس الموضوع مع متحف محمد محمود خليل وحرمه.

كمان شهدت أسعار دخول 8 متاحف فنية تانية زيادة في الأسعار بالنسبة للمصريين والطلاب، بواقع 5 جنيه للمصريين و3 جنيه للطلاب، و 10 جنيه للأجانب و20 جنيه لراغبي التصوير، والمتاحف دي منها: متخف عفت ناجي وسعد الخادم، ومتحف محمد ناجي، ومتحف محمود مختار، ومتحف زكريا الخناني، ومتحف راتب صديق، ومتحف إنجي أفلاطون بقصر الأمير طاز، و متحف حسن حشمت.

أما المتاحف القومية فنص القرار بشأنها على زيادة أسعار تذاكر دخول 8 متاحف، من بينها متحف جمال عبد الناصر بمنشية البكري، واللي أصبح سعر تذكرة دخوله بالنسبة للمصري 10 جنيه، وبالنسبة للطالب 5 جنيه، وبالنسبة للأجنبي 20 جنيه، وبالنسبة للتصوير الفوتوغرافي 20 جنيه.

كمان فيه زيادة في أسعار تذاكر متحف بيت الأمة، ومتحف أحمد شوقي، ومتحف طه حسين.

وفيه 6 فئات من حقهم دخول المتاحف دي مجاناً وهم : ذوي الاحتياجات الخاصة، والمحاربين القدامى، وكبار السن فوق 60 سنة، و صغر السن أقل من 12 سنة، وأعضاء النقابات الفنية المهنية، وأعضا اللجان الوطنية للمتاحف العالمية.