دليلك لويك إند سعيد: القاهرة منورة بـ “فايا يونان” و”الكف الأسواني” و”رباعي أوتار”
Cairo 360
حاول تكتشف حاجات جديدة وتستمتع بكل لحظة في حياتك، وأجندة كايرو 360 هتساعدك تكتشف أهم الأحداث الفنية والثقافية اللي بتحصل في القاهرة.
نبدأ بالنهارده الخميس، وحفل لفرقة الكف الأسواني على مسرح الضمة في عابدين.و سعر التذكرة: 30 جنيه.
كمان لعشاق الطرب الأصيل فيه حفل لفرقة منيب في ساقية عبد المنعم الصاوي في قاعة الحكمة، وسعر التذكرة 35 جنيه.
أما لو عاوزين تخرجوا بره الصندوق زي ما بيقولوا فملاذ عاملين ورشة تعلم فن رقص الصالصا، وتقدروا تعرفوا التفاصيل من هنا.
ولمدمنين الشوكولاتة جيلاتو ميو مش بيهزر، وعامل كعادته يوم كامل فيه كل أنواع آيس كريم الشوكولاتة والقهوة، أعرفوا تفاصيل أكثر هنا.
لكن لو أنتم من الناس العميقة اللي بتحب تغذي مخها أكثر من بطنها، يبقى مكانكم النهارده في الـ AUC main campus في التحرير، واللي هيكون فيه ندوة مختلفة عن تاريخ الفلسفة الإسلامية، بعنوان “هي الفلسفة حرام؟” واللي هيحاضر فيها محمد سامي واللي له اهتمام خاص بالعلوم التراثية الإسلامية وقرأ في مقدماتها على شيوخ من اليمن، ومصر، وموريتانيا، وبريطانيا وحاصل على ماجستير في الفلسفة من الجامعة الأمريكية، والتفاصيل هنا.
وننتقل ليوم الجمعة، وحفل لفرقة فاطمة عادل في مركز روم في جاردن سيتي، وسعر التذكرة 50 جنيه، وهي فرقة مصرية متخصصة فى الأغانى الفلكولورية والدرامية وغناء السيرة الهلالية.
أما في مركز الربع ففيه حفل لفرقة أوركسترا فنون عود وجيتار واللي بيعزفوا ألوان مختلفة من الموسيقى، وسعر التذكرة 50 جنيه.
وبعد غياب طويل هتهل علينا “فايا يونان” في حفل في الحديقة الصينية، وسعر التذكرة للوقوف 100 جنيه، وللجلوس 300 جنيه، والتفاصيل هنا.
ونختم بيوم السبت، ومركز باب 18 للفنون عامل حفل لفرقة رباعي أوتار، واللي بتقدم موسيقى كلاسيقية وشرقية. التفاصيل هنا.
كمان في علبة ألوان في الزمالك هيكون فيه حفل روك لعمر غالي وصحابه، والسعر شامل مشروب واحد بـ 75 جنيه. والتفاصيل هنا.
أما للي بيحبوا يكتبوا بس مش عارفين ينموا موهبتهم فيه ورشة كتابة مختلفة للكاتبة شيرين هنائي في مركز الربع، أعرفوا التفاصيل من هنا.
ويك إند سعيد!
مقترح
فن وثقافة
طبلة الست.. فرقة غنائية بتنشر الفرح وتحيي التراث
حفلات طبلة الست حفلات غنائية في القاهرة +5
الحياة في كايرو
