Omar Abd-elmaqsoud
بعد الأخبار عن زيادات جديدة في أسعار استهلاك الكهرباء، بقينا كلنا بنسأل عن أنسب وأفضل الطرق اللي نقدر نرشد بيها استهلاكنا للكهرباء في بيوتنا بشكل عام، وخاصة مع ارتفاع درجات الحرارة.
في الموضوع ده هنقدملكم مجموعة نصائح هتساهم بشكل قوي وفعال في ترشيد الاستهلاك المنزلي للكهرباء:
بالنسبة للإضاءة جوه البيت، حاول في فترات النهار تعتمد على نور الشمس الطبيعي، وبلاش تشغل أي أنوار إلا في الضرورة.
دايماً سواء بالليل أو بالنهار، حاول تطفى الإضاءة اللي شغاله في الأماكن اللي مافيهاش حد، ومش مشغولة.
غير لمبات الإضاءة العادية بلمبات فلورسنت أو لمبات موفرة للطاقة.
بالنسبة للتكيفات، دايماً ركز في إن الأبواب والشبابيك في الغرفة اللي شغال فيها التكيف تكون مقفولة، وده علشان تضمن تبريد سريع للغرفة وعدم تسريب للهوا الساقع، وبالتالي عدد ساعات شغل أقل للتكييف، وتوفير أكتر للكهراء.
في بعض أيام الصيف، وفي بعض الأماكن والحالات، المروحة بتكون كفاية لتلطيف درجة حرارة المكان.
بشكل عام، لما تيجي تركب جهاز كهربائي جديد، اقرأ طريقة الاستخدام كويس، أو كلم حد مختص يركبه ويعرفك أفضل استخدام ليه.
يفضل ماتزودش درجة حرارة التكييف عن 25 درجة مئوية، وبلاش استخدام التكييف عمال على بطال.
حاول بقدر الإمكان تواظب بشكل دوري على صيانة جهاز التكييف عن طريق تنظيف فلتر الهواء، والتأكد من أنّ كل الأجزاء المتحركة في جهاز التكييف شغالة بسهولة، وأنّ حركة سريان الهواء سهلة وبتشتغل بكفاءة عالية.
تجنب أن يكون ثرموستات جهاز التكييف قريب من اللمبات أو مصدر للحرارة، وبلاش استخدام مزيل الرطوبة أثناء تشغيل جهاز التكييف.
لو لسه هتشتري تكييف جديد، أولًا مبروك، ثانيًا اختار الجهاز الأكثر كفاءة، يعني الأقل في استهلاك الكهرباء، وتقدر تعرف ده من بطاقة كفاءة الطاقة اللي هتلاقيها ملزوقة على كل الأجهزة الكهربائية.
بالنسبة للغسالات سواء غسالة أطباق أو غسالة ملابس، ما تبدأش تشغيل الغسالة إلا لو كانت مليانة تمام، لأنّها في العادة بتستهلك نفس الكهرباء والماء السخن والصابون سواء في غسلة مليانة أو نص مليانة.
استخدم الماء السخن للملابس المتوسخة أوي، مش مع كل الملابس، ولا في كل دورات الغسيل.
في الشطف، استخدم دايمًا ماء بارد.
بلاش تسيب الغسالة (سواء غسالة أطباق أو غسالة ملابس) متوصلة بالكهرباء على طول، افصل الكهرباء عن الغسالة لو مش هتستخدمها.
في السخانات، بلاش تضبط درجات الحرارة على أقصى درجة في السخان، لإن ده بيجهد السخان، وبيقلل من عمره الافتراضي، وبيرفع من قيمة فاتورة الكهرباء.
لو مش محتاج السخان طول اليوم افصله عن الكهرباء، لأن حرارة الماء بتروح مع الوقت، وبالتالي السخان هيفضل يشتغل حتى لو مش بتستخدمه.
يفضل أن المسافة بين السخان والحنفية أقل من 10 متر، لإن المواسير الطويلة بتخلي الماء يفقد حرارته في الطريق، وبالتالي استهلاك أكبر وأكتر للكهرباء.
في التلاجات، دايمًا اتأكد إنك قفلت باب الثلاجة وراك، وبلاش تقعد تفتح وتقفل فيه بدون داعي.
يفضل أن الفريزر يكون مليان على الآخر، واملى الفراغات بأكياس مكعبات الثلج.
استخدم كولمان ماء للشرب في الصيف، علشان تقلل عدد مرات فتح التلاجة.
ماتحطش أكل سخن في الثلاجة قبل مايبرد.
في التلفزيون أو الريسيفر، افصل الكهرباء عنهم في حالة عدم استخدامهم من الفيشة مش باستخدام الريموت.
ماتسيبش شاحن الموبايل في الفيشة بعد ماتخلص.
مقترح
فن وثقافة
"حفلة 3 في سيما مترو".. الحكاية التاريخية لأول دار عرض سينمائي مكيفة في القاهرة
MGM القاهرة زمان +11
معالم وسياحة
