The Definitive Guide to Living in the Capital , Cairo , Egypt

في شوارع مصر ممكن نخسر جزمة، أو على أقل تقدير أكيد هتتوسخ ومش هتبقى نضيفة، وده بيعرضنا لأزمة كبيرة لو مش بنعرف ننضفها في البيت، لأن الشكل العام مش بيكون حلو، وعلشان كده أول ما عرفنا أن فيه حد اسمه دكتور شو بينضف الجزم والكوتشيهات في القاهرة وبيصلحها ويرجعها جديدة من تاني، قررنا نجربه وننقل لكم تجربتنا معاه، وفي السطور الجاية هنقولكم على كل اللي محتاجين تعرفوه عن المكان ده.

دكتور شو هو محل متخصص في صيانة الجزم وله 7 فروع في القاهرة، في مدينة نصر، مصر الجديدة، والرحاب، لكنه عنده خدمة تسليم وتسلم من كل مكان في القاهرة، وفوجئنا كمان أنه مشهور جدًا في مجال التصليح، وكمان مجال نظافة كل أنواع الأحذية، فقررنا نتواصل معاهم ونطلب منهم ييجوا ياخدوا الكوتشيات بتاعتنا اللي كانت عاوزة تتنضف وتتصلح، وفعلًا بعتوا لنا الدليفري بتاعهم علشان يستلم مننا الأحذية.

بالفعل في نفس اليوم جه الدليفري اللي بياخد 60 جنيه توتال على استلام وتسليم المنتجات مهما كان عددها، وأخد مننا شنطة فيها 8 جزم بأنواع مختلفة، وفي الحقيقة كنا فاكرين إننا هنستلم في نفس اليوم، ولكن طلع ان النظافة بتقعد 4 أيام، وسعر تنضيف “جوز” الكوتشي أو الجزمة 30 جنيه.

في اليوم الرابع من الاستلام كانت الأحذية خلصت وبالفعل المندوب كلمنا علشان نحدد ميعاد الاستلام، وبلغنا أن التكلفة الإجمالية 380 جنيه، وبالفعل وصل في الميعاد وسلمنا الأحذية كاملة وحاسبناه، وكانت الأحذية متغلفة كويس.

مبدئيًا كان فيه ضمن الجزم “هاف بوت” اتغير له سوسته ودي كانت بـ90 جنيه لوحدها، وطبعًا ده سعر غالي جدًا بالنسبة لأسعار السوق.

أما الأحذية بكل أنواعها الحقيقة رجعت نضيفة جدًا، ولكن فيه 6 جزم منهم النعل مش أحسن حاجة، ومحتاج شغل عليه، أما بخصوص السوستة اللي ركبت فهي كانت عادية ولكن اللي عرفته من المندوب أن دي أسعارهم الطبيعية، ولكن الحاجة اللي ضايقتنا أن كل الجزم جت مبلولة مش ناشفة، وهتقعد وقت أكتر علشان ننشفها ونقدر نستخدمها.

بصفة عامة تجربتنا مع المكان كانت إيجابية، وبننصحكم تتعاملوا معاه، لكن نصيحتنا تأكدوا عليهم كل التفاصيل الصغيرة اللي محتاجينهم يهتموا بيها.