حديقة ومسرح ومرسم.. التفاصيل الكاملة لتطوير ميدان القلعة التاريخي بقلب القاهرة
القاهرة التاريخية القلعة تطوير القاهرة تطوير القاهرة القديمة تطوير ميدان القلعة خطة تطوير القلعة
Mohamed Talaat
الصورة من هنا.
كل يوم تقريبًا بقينا بنسمع خبر مبهج عن القاهرة! ودي حاجة بتخلي عشاق العاصمة المصرية يحسوا بسعادة كبيرة. ومؤخرًا أعلنت مصر عن خطة عظيمة لتطوير واحد من أقدم وأهم ميادين القاهرة، وهو ميدان القلعة، اللي بيعرف كمان باسم “ميدان الرميلة” أو ميدان صلاح الدين الأيوبي، والميدان ده كان موجود فيه زمان محطة الميدان ومسطبة المحمل، وهو في الأصل من بقايا ميدان أحمد بن طولون، وموقعه أسفل القلعة.
في السطور الجاية هنعرفكم على 5 معلومات فيهم الخلاصة عن خطة تطوير الميدان المهم ده، مدرها هو تصريحات إعلامية حديثة لرئيس صندوق التنمية الحضارية، المهندس خالد صديق.
1 – خطة تطوير ميدان القلعة بتتضمن تنفيذ حديقة ترفيهية على أعلى مستوى، علشان يقدر الزائر أو السائح الاستراحة فيها بعد زيارة المعالم الأثرية الموجودة في المنطقة دي، ومنها طبعًا القلعة ومسجد الرفاعي.
2 – هيتم كمان إنشاء مطاعم وكافيتريات ومسرح صغير، لإقامة العروض الفنية والثقافية في ليل القاهرة.
3 – الرسامين والفنانين اللي بيعشقوا الفن والتاريخ الإسلامي هيكون لهم مرسم خاص في حديقة الميدان، هيقدروا فيه يرسموا لوحاتهم واستلهام أفكارهم من الأماكن دي.
3 – هيتم إزالة المباني غير التاريخية اللي أصبحت أقرب لخرابات في المنطقة، أما أي أثر مُسجّل ضمن وزارة الآثار واليونسكو، فهيتم ترميمه.
4 – هيتم توحيد تصميم الواجهات الخارجية للمنازل اللي في المنطقة علشان تبقى كلها على الطراز الإسلامي.
5 – فيه 3 مكاتب استشارية شغالة حاليًا على إعداد الدراسات الخاصّة بالمنطقة دي، بيستخدموا أحدث الأجهزة المساحية لرفع كفاءة البيوت والمساحات بالليزر، والاعتماد على المصادر التاريخية ولوحات المستشرقين علشان يعرفوا شكل المنطقة في العصر الإسلامي.
