The Definitive Guide to Living in the Capital , Cairo , Egypt

يمكن تكون اتفرجت على فيلم “حارة برجوان” اللي قامت ببطولته نبيلة عبيد مع يوسف شعبان، واللي كانت بتدور أحداثه في مصبغة. لكن مش كتير يعرفوا إن برجوان هي حارة حقيقية في القاهرة، ومش مجرد حارة عادية، لكنها جزء مهم من تاريخ المدينة.. مدينة القاهرة!

تعالوا نتعرف على 5 معلومات بيختصروا حكاية حارة برجوان التاريخية.

1 – بتعتبر برجوان واحدة من أهم الحارات التاريخية المصرية الموجودة في القاهرة القديمة، وهي حارة قديمة جدًّا بترجع تسميتها بالاسم ده لخادم الخليفة الفاطمي، واللي كان اسمه “أبي الفتوح برجوان”، والشخص ده هو اللي كان مسؤول عن إدارة شؤون البلاد بعد وفاة الخليفة الفاطمي، لإن في الوقت ده ابن الخليفة كان لسة صغير، فبعد وفاة الخليفة اتولى برجوان الحكم لحد ما يكبر ابنه ويستلم الحكم. لكن استغل “برجوان” منصبه وجمع ثروة كبيرة وأصبح له نفوذ كبير، ولما كبر الحاكم بأمر الله قبض عليه وقتله.

2 – بتقع حارة برجوان في حي الجمالية عند باب الفتوح في القاهرة، وبيقال إنها الحارة اللي نشأ فيها المقريزي، وهو مؤرخ مسلم شهير، وكان موقع الحارة دي في العصر الفاطمي بالقرب من الميدان المجاور للقصر الغربي الصغير، اللي بيعرف بحي “الخرتشف” وتم تحريف الاسم بعد كدة وأصبح “حي الخرنفش”.

3 – عند مدخل حارة بجوان هتلاقوا بوابة من الحجر، بناها سليمان باشا السلحدار في العصر العثماني، والحارة دي بتحتوي على آثار فريدة وتاريخية، ومنها: بوابة برجوان، وجامع أبو بكر مزهر، وزاوية نور الدين جولاق.

4 – من أشهر الحكايات عن الحارة دي، أنه كان فيها مدفن ابن بدر الجمالي وتم هدمه واتبنى مسجد صغير عليه، وبيقال كمان إنه كان فيها البيت اللي عاش فيه المقريزي لكنه اتهد بعد كده، وكان فيها كمان قصر للخديوي عباس حلمي الأول وبعد هدمه اتبنت مكان مدرسة ثانوي صناعي حاليًّا.

5 – بتنتهي حارة برجوان من الجهة الغربية بحارة الشعراني، ودي الحارة اللي نشأ فيها المطرب والموسيقار الكبير محمد عبد الوهاب.