الساعة بجنيه.. كل اللي محتاجين تعرفوه عن مشروع “كايرو بايك” (صور)
Omar Abd-elmaqsoud
مشروع “كايرو بايك” واحد من المشاريع المهمة اللي أعلنت عنها محافظة القاهرة من فترة، وساعتها كان الإعلان عن المشروع اللي بتتبناه المحافظة بالتعاون مع شركاء التنمية وبدعم من برنامج الأمم المتحدة للمستوطنات البشرية UNHABITAT، وتمويل من مؤسسة دروسوس السويسرية drosos، ودعم فني وإشراف من معهد سياسة النقل والتنمية ITDP من خلال محطة تجريبية في ميدان “محمد فريد” بجوار مبنى المحافظة.
يوم الثلاثاء 19 أغسطس أعلنت المحافظة عن البدأ في تنفيذ 5 محطات جديدة في طاق وسط البلد، وفعلًا فريق “كايرو 360” زار واحدة منهم، والي كانت في “ميدان التحرير” واتعرفنا من خلال المشرفين الموجودين في المحطة على كل التفاصيل الممكنة عن الخدمة اللي هيتم إطلاقها بشكل رسمي يوم 1 أغسطس الجاي.
في الأساس مشروع “كايرو بايك” هدفه توفير وسيلة نقل آمنة وخالية من التلوث، وسريعة وفي نفس الوقت بتدي منظر حضاري وشيك للعاصمة، والجميل كمان إن الكشف عن المشروع تزامن مع استضافة مصر للدورة الـ27 لقمة المناخ، واللي هتقام خلال الفترة من 7 لـ 18 نوفمبر 2022 في شرم الشيخ.
نرجع لزيارتنا لمحطة التحرير واللي عرفنا من المسؤولين عنها إن فيه 45 محطة كمان هيتم إنشاؤهم خلال الأيام المقبلة، هتوفر شبكة كبيرة من النقاط اللي فيها دراجات للاستخدام العام، وهتتوزع المحطات دي على مناطق حيوية في وسط البلد، زي ميادين التحرير وعبد المنعم رياض، ومحمد فريد وشارع الفلكي وعبد الخالق ثروت، بالإضافة لمناطق جاردن سيتي والزمالك، وبأسطول مكون من 500 دراجة.
تأجير الدراجة بيكون بخطوات سهلة جدًا، وبدون أي تدخل بشري، وبيحصل من خلال تطبيق “Donkey Republic” على App Store للآيفون، أو Google Play للأندرويد، ومن خلاله بتقدر تأجر الدراجة بالمدة اللي تحددها، وتدقع قيمة الإيجار.. واللي بتكون كالتالي:
الساعة الواحدة = جنيه واحد
12 ساعة = 8 جنيه
الشهر = 100 جنيه
6 شهور = 400 جنيه
السنة = 600 جنيه
مع الأخذ في الاعتبار أن قيمة الإيجار للمدد الطويلة بتكون زي اشتراك، بيسمحلك تأجر الدراجة من أي محطة، ولأي مدة خلال اليوم، لكن لازم ترجع الدراجة لأي محطة بعد ما تنتهي من مشاويرك أو رحلتك في نهاية اليوم، وماينفعش تاخذها معاك البيت.
الإيجار بيدفع من خلال الفيزا أو الديبت كارد الخاص بك على الأبليكيشن، وممكن كمان تدفع من خلال كارد خاص مسبق الدفع هيكون متاح من خلال شركة “راسكوم” المسؤولة عن إدارة المشروع.
مقترح
الحياة في كايرو
3 أماكن في القاهرة لتعلم فنون الطهي.. طلع الشيف المحترف اللي جواك
ازاي تبقى شيف محترف اماكن تعليم الطبخ في القاهرة +4
فن وثقافة
