The Definitive Guide to Living in the Capital , Cairo , Egypt

كتير مننا بيحبوا يعملوا في وقت فراغهم حاجة مفيدة، وفيه اللي بيحبوا المشغولات والحرف اليدوية ونفسهم يتعلموها، وفيه اللي عاوز يعمل “كارير شيفت” ويخلي الحرف اليدوية مهنة تكون مصدر رزق، وده اللي بتعمله “أكاديمية الحرف اليدوية” في القاهرة، وهي مكان مميز هيعلمكم حرف كتير مختلفة، والمكان بيوفر تدريباته للكبار والصغار، وفي السطور اللي جاية هنقولكم على كل اللي محتاجين تعرفوه عن دورات الأكاديمية دي.

الأكاديمية بتعتبر من أقدم الأماكن اللي بتعلم بشكل احترافي شغل الهاند ميد في القاهرة، وعندهم 81 تدريب تقدروا تختاروا منهم اللي حابين تتعلموه، وبحسب ما قالت صفحتهم أن عدد خريجين الأكاديمية لحد سبتمبر 2019، 11 ألف و772 خريج.

ومن ضمن التدريبات اللي بتتعمل في المكان صناعة المنتجات الجلدية والتورت المجسمة والكروشيه اللي بيكون سعر التدريب كامل 990 جنيه، وبيكون مدته شهرين بواقع 3 ساعات لكل يوم حسب المواعيد اللي بتختاروها.

كمان تقدروا تتدربوا على كورس تدريب صناعة الأباجورات وشجر الخرز، وكورس الموزاييك جلاس، والرسم على الرصاص بـ590 جنيه، وكمان عندهم تدريب على احتراف صناعة شموع الزينة والشموع العطرية، بسعر 2000 جنيه، واحتراف الباترون والخياطة بـ2000 جنيه.

وبيعملوا كمان كورسات لصناعة كل أنواع المنتجات الجلدية بـ1900 جنيه، وده بيكون كورس شامل بيبدأ من الألف حتى بيع المنتجات، ده غير كورس مشروع صناعة الحلي والإكسسورات الحريمي اللي بـ1250 جنيه، وكورس احتراف صناعة التورت المجسمة لوحده اللي بـ2000 جنيه، ده غير كورس احتراف صناعة الأباجورات ووحدات الإضاءة اللي بـ590 جنيه.

نظام الدورات عندهم بيكون 5 محاضرات وكل محاضرة بتكون من 3 لـ4 ساعات، على حسب عدد ساعات الكورس، وماتنسوش تتابعوهم علشان بيعملوا دورات مجانية كتير.

العنوان: 25 شارع محمد كامل الحاروني – خلف حديقة الطفل – مدينة نصر.

التليفونات: 01022600780 – 01000681231 – 01000681237 – 0226708253

وعلشان تعرفوا أكتر عنهم تقدروا تزوروا صفحتهم على فيسبوك من هنا.