The Definitive Guide to Living in the Capital , Cairo , Egypt

بعد سنين من الانتظار، مصر أخيرًا بتعلن الافتتاح الرسمي للمتحف المصري الكبير في 3 يوليو 2025! متحف هيغيّر خريطة السياحة العالمية، وهيكون بوابتك لعالم قدماء المصريين بكل تفاصيله وأسراره. من تمثال رمسيس الثاني الضخم، لمراكب الشمس اللي بتحكي قصة الإله رع، لحد القاعات المبهرة اللي بتاخدك في رحلة عبر العصور.. جهز نفسك لتجربة مافيش زيها في أي مكان في العالم!

رئيس هيئة المتحف المصري الكبير، أحمد غنيم، أكد إن الافتتاح هيكون يوم 3 يوليو 2025، وإن الشركة المتحدة للخدمات الإعلامية هتتولى تنظيم الحفل. السيناريوهات لسه بتتحدد، وممكن تمتد الاحتفالات لأيام أو حتى شهور، وده بيعكس أهمية المتحف كأكبر صرح أثري متخصص في الحضارة المصرية في العالم.

رحلتك داخل المتحف.. منين تبدأ وإزاي تكتشف كنوزه؟
بمجرد دخولك المتحف، المجاور موقعه لأهرامات الجيزة العظيمة، أول حاجة هتقابلك هي القاعة الكبرى، واللي فيها تمثال الملك رمسيس الثاني، التمثال الأشهر في مصر، واللي كان في ميدان رمسيس واتنقل للمتحف، وزنه 85 طن وطوله 11 متر! كمان هتشوف عمود النصر للملك مرنبتاح اللي بيحكي قصة انتصار المصريين على شعوب البحر.

بعد القاعة الكبرى، هتدخل على القاعات الرئيسية، وهناك هتشوف 15 ألف قطعة أثرية بتغطي تاريخ مصر من قبل الميلاد لحد العصر الروماني. كل قاعة هتحكي حكاية:

– قاعة عصر القوة: هتعرفك على المشرفين على بناء الأهرامات والحرفيين اللي سابوا لنا تراث أثري مميز من الفخار والمنحوتات والأدوات.
– قاعة المعتقدات الدينية: هتشوف فيها طقوس الحج إلى أبيدوس، وتماثيل آلهة المصريين القدماء، والممارسات الروحية اللي كان بيؤمن بيها الفراعنة.
– قاعة الدولة الحديثة: هتقابل فيها “حتشبسوت” ملكة السلام والتجارة البحرية، وهتشوف تماثيل ومقتنيات الملك إخناتون اللي أدخل عبادة آتون.
– قاعة العصر المتأخر: هتكتشف فيها إزاي تأثرت الحضارة المصرية بالفن الروماني والإغريقي، وبدأ استخدام الصور والرسومات على التوابيت.

سفينة خوفو.. رحلة إلى العالم الآخر
واحدة من أهم القطع الأثرية في المتحف هي مراكب الشمس، وأشهرهم سفينة الملك خوفو، اللي كانت مدفونة جنبه عند الهرم الأكبر، علشان تساعده في رحلته للعالم الآخر. واحدة من السفن دي جاهزة للعرض، والتانية بيتم ترميمها حاليًا لإعادتها لحالتها الأصلية.

وبعد ما تخلص جولتك، هتنزل على الدرج العظيم، واللي فيه 60 تمثال ملكي من أروع التماثيل النادرة، بتمثل رحلة الملوك للحياة الأبدية. في آخر الدرج، هتلاقي قاعة ضخمة بتطل على الأهرامات، وكأنها بتوصلك لنهاية الرحلة الفرعونية من البداية للنهاية.

متحف الأطفال.. تجربة تفاعلية لكل الأعمار
المتحف مش بس للكبار، فيه متحف الأطفال، اللي بيعتمد على تقنيات الواقع المعزز، مع مجسمات تماثيل من مواد مستدامة، وكمان تماثيل بطريقة برايل لمساعدة المكفوفين.

في نهاية الجولة، تقدر تستمتع بزيارة متحف الهداية، أو تتجول في المنطقة التجارية، اللي فيها منتجات يدوية مصرية أصيلة، وكمان تقدر تاخد قهوتك أو مشروبك المفضل في كافيهات ومطاعم المتحف بإطلالة ساحرة على القاعة الكبرى.